ރައީސުލްޖުމްހޫރިއްޔާ ޑރ.މުހައްމްދު މުއިއްޒުގެ ވެރިކަމުގެ ފުރަތަމަ 14 ހަފްތާ ގުނާނީ ބަންދު ދުވަސްތައް ވެސް ހިމަނައިގެން ކަމަށް ރައީސް އޮފީހުން ބުނެފިއެވެ.
ރައީސް އޮފީހުގެ ސްޓްރެޓީޖިކް ކޮމިއުނިކޭޝަން މިނިސްޓަރު އިބްރާހީމް ހަލީލު "ވޮއިސް" އަށް މައުލޫމާތު ދެއްވަމުން ވިދާޅުވެފައިވަނީ، އިންތިގާލީ މަރުހަލާގައި އާންމު ކުރި ހަފްތާ 14 ގައި ހުރި ކަންކަން ފުއްދުމަށް 14 ހަފްތާ ގުނާނީ ބަންދު ދުވަސްތައް ހިމަނައިގެން ކަމުގައެވެ.
ހަފްތާ 14 ގައި އެކަށައަޅާފައި ހުރި ކަންކަން މުއްދަތަށް ސަރުކާރުން ނިންމާނެ ކަމުގެ ޔަގީންކަން ވަނީ ރައީސް އޮފީހުން ދީފައެވެ.
ހާއްސަ ރަސްމިއްޔާތެއްގައި ހަފްތާ 14 ނަމުގައި ރައީސް މުއިއްޒުގެ ފުރަތަމަ 14 ހަފްތާގެ މަގު ޗާޓް އިފްތިތާހް ކުރެއްވީ ރައީސް ޑރ.މުއިއްޒެވެ. އެ މަގު ޗާޓުގައި 161 ވައުދު ފުރިހަމަކުރުމަށް ހިމެނެއެވެ. އެ ޗާޓުގެ މަސައްކަތް ބަހާލާފައިވަނީ އަށް ދާއިރާއަކަށެވެ.
ރައީސް މުއިއްޒު ކެމްޕެއިންގެ ތެރޭގައި ދެއްކެވި ހުރިހާ ވާހަކަފުޅަކާއި ނޫސްވެރިންގެ ބައްދަލުވުންތަކުގައި ހިމެނޭ ހުރިހާ ވާހަކަފުޅެއް ހިމަނައިގެން ފޮތެއްވެސް މިހާރުވަނީ ނެރެފައެވެ.
މުއިއްޒު ވިދާޅުވި ގޮތުގައި ރިޔާސީ އިންތިހާބުގެ ވައުދުތައް ފޮތެއްގެ ސިފައިގައި ނެރުނީ ހާމަކަން ބޮޑު ގޮތެއްގައި މަސައްކަތް ކުރައްވާށެވެ. އަދި އެމަނިކުފާނު ވެވަޑައިގަތް ވައުދުތައް ފުއްދާ މިންވަރު ބަލަން ރައްޔިތުންނަށް ފަސޭހަވާނެ ކަމަށް ވެސް އެމަނިކުފާނު ވިދާޅުވިއެވެ.
Advertisement
This content is created and paid for by advertisers and does not involve Voice Journalists
