ތިމާވެއްޓަށް އަސަރު ފޯރާނެ މިންވަރު ބަޔާން ކުރާ ރިޕޯޓު ހެދުމާ ބެހޭ ގަވައިދުގެ ދަށުން އީއައިއޭ މަރުހަލާ ފުރިހަމަ ނުކޮށް 21 ރަށެއްގައި އިންޖީނުގެ އެޅުމުގެ މަޝްރޫއު ކުރިއަށް ގެންގޮސްފައިވާތީ 4.2 މިލިއަން ރުފިޔާއިން އީޕީއޭއިން ފެނަކަ ޖޫރިމަނާކޮށްފި އެވެ.

އެންވަޔަރަމެންޓް ޕްރޮޓެކްޝަން އޭޖެންސީ (އީޕީއޭ) އިން ކުރި އިއުލާނުގައި ފެނަކައަށް އަންގާފައި ވަނީ މިއަދުން ފެށިގެން 30 ދުވަހުގެ ތެރޭގައި އެފައިސާ ދެއްކުމަށެވެ.

އީޕީއޭ އިން ބުނި ގޮތުގައި ގަވައިދުގައި ބުނާ މަރުހަލާތައް ފުރިހަމަކުރުމަށް ފަހު ކުރިއަށް ގެންދިއުމަށް ވަނީ އެދިފަ އެވެ.

Advertisement

އީއައިއޭ މަރުހަލާ ފުރިހަމަނުކޮށް އިންޖީނު ގެ އަޅާ ރަށްތަކަކީ ހއ. އުލިގަމާއި ހއ. އުތީމާއި ހއ. ދިއްދު އާއި ހއ. މުރައިދު އާއި ހއ. މޮޅަދު އާއި ހދ. ފިނޭ އާއި ހދ. ކުޅުދުއްފުއްޓާއި ހދ. ކުމުންދު އާއި ށ. ފޭދޫ އާއި ށ. މާއުނގޫދު އާއި ށ. ކޮމަންޑު އާއި ނ.ފޮއްދު އާއި ނ. ކެނދުކުޅުދު އާއި ރ.ރަސްގެތީމާއި ރ. ކިޅޮހާއި ޅ.ކުރެންދު އާއި ދ. މީދު އާއި ލ.މާބައިދު އާއި ގދ. މާވަރުލު އާއި ގދ.ރަތަފަންދު އާއި ގއ. ވިލިނގިލި ހިމެނެ އެވެ.

މީގެ ކުރިން ވެސް ފެނަކައިން ގަވައިދާ ހިލާފަށް އަމަލުކޮށްފައިވާތީ ހަ ފަހަރެއްގެ މަތިން ފިޔަވަޅު އެޅި އެވެ.