ޣައްޒާގެ އަލް ޝިފާ ހޮސްޕިޓަލުގެ އެންއައިސީޔޫގައި ފަރުވާދެމުން ދިޔަ 31 "ޕްރިމެޗުއަރ" ކުއްޖަކު އެހެން ދެ ހޮސްޕިޓަލަކަށް ބަދަލު ކުރުމުގެ ދަތުރު ފަށައިފިއެވެ.

އަލްޖަޒީރާގައި ބުނެފައިވަނީ ޣައްޒާގެ އަލްޝިފާގައި ތިބި ޕްރޮމެޗުއަރ 31 ކުއްޖަކު އެމްބިޔުލާންސްތަކުގައި ޣައްޒާގެ ދެކުނަށް ގެންދިޔުމުގެ ދަތުރު ފެށިފައިވާ ކަމަށެވެ.

އެކުދިން ސަލާމަތް ކުރުމަށް މަސައްކަތް ކުރަމުންދާ ޖަމިއްޔާ އިން ވަނީ ޣައްޒާގެ ދެކުނަށް އެކުދިން ގެންދިޔުމަށް 6 އެމްބިޔުލާންސްއެއް އަލް ޝިފާ އަށް ފޮނުވައިފައެވެ.

މި 31 ކުދިން ޣައްޒާގެ ދެކުނަށް ގެންދިޔުމަށްފަހު 2 ހޮސްޕިޓަލަކަށް ބަހައި ލެވޭނެ ކަމަށް އަލްޖަޒީރާގައި ބުނެފައިވެއެވެ. އެގޮތުން އެެއްބައިކުދިން އަލް ނައްސިރް ހޮސްޕިޓަލަށް އަދި އަނެއް ބައިކުދިން ޔޫރަޕިއަން ހޮސްޕިޓަލަށް ގެންދިޔުމަށް ވަނީ ހަމަޖެހިފައެވެ.

އަލްޖަޒީރާގައި އިތުރަށް ބުނެފައިވަނީ ޝިފާ ގައި ތިބި ކުދިން ޣައްޒާގެ ދެކުނުގައި ހުރި ހޮސްޕިޓަލް ތަކަށް ގެންދިޔަ ނަމަވެސް އެހޮސްޕިޓަލްތައްވެސް ވަނީ ފުރިފައި ކަމަށެވެ.

އެގޮތުން އަލް ނައްސިރް ހޮސްޕިޓަލުގެ 12 އިންކިބިޔުޓަރ އެެއް މިހާރުވެސް ބޭނުން ކުރެވެމުންދާއިރު އެތަނުގައި ހުސްކޮށް ހުރީ 6 އިންކިބިޔުޓާއެއް ކަމަށް އަލްޖަޒީރާގައި ބުނެފައިވެއެވެ.