ދިވެހި ރާއްޖޭގެ ގައުމީ ޔުނިވާސިޓީގެ ޗާންސެލަރު ކަމަށް ޑރ. މަހުމޫދު ޝައުގީ މިއަދު އައްޔަން ކުރައްވައިފި އެވެ.
މި މަގާމަށް ޝައުގީ އައްޔަންކުރައްވާ މަގާމުގެ ފަތްކޮޅު އެރުއްވީ ރައީސް އޮފީހުގައި ބޭއްވި ރަސްމިއްޔާތެއްގައި ރައީސް ޑރ. މުހައްމަދު މުއިއްޒު އެވެ.
ކުރީގެ މިނިސްޓަރު ޑރ. ޝައުގީ އަކީ ކުރިން ޓޫރިޒަމް މިނިސްޓަރު ކަމާއި އެޑިއުކޭޝަން މިނިސްޓަރު ކަން ވެސް ކުރައްވައިފައިވާ ބޭފުޅެކެވެ.
އޭނާ މި މަގާމަށް އައްޔަން ކުރެއްވި އިރު، ގައުމީ ޔުނިވާސިޓީގެ ޗާންސެލާ ކަމުގެ މަގާމު އެންމެ ފަހުން އަދާކުރެއްވީ ޑރ. ހަސަން ހަމީދެވެ.
ރައީސް މުއިއްޒު މިއަދު ވަނީ ޔުނިވާސިޓީގެ އެހެން މަގާމުތަކަށް ވެސް ބޭފުޅުން އައްޔަން ކުރައްވާފަ އެވެ.
އެގޮތުން ގައުމީ ޔުނިވާސިޓީގެ ވައިސް ޗާންސެލަރު ކަމަށް އައްޔަން ކުރެއްވީ ޑރ. އައިޝަތު ޝެހެނާޒް އާދަމް އެވެ. އަދި އިސްލާމީ ޔުނިވާސިޓީގެ ވައިސް ޗާންސެލަރު ކަމަށް އައްޔަން ކުރެއްވީ ޑރ. އަލީ ޒާހިރު އެވެ.
މީގެއިތުރުން ރައީސް މުއިއްޒު މިއަދު ވަނީ ރައީސް އޮފީހުގެ މިނިސްޓަރުގެ މަގާމަށް އިގްބާލް އާދަމް އަދި ފޮރިން މިނިސްޓްރީގެ އެމްބަސެޑާ އެޓް ލާޖްގެ މަގާމަށް މުހައްމަދު ހުސެއިން ޝަރީފު (މުންދު) ވެސް އައްޔަންކުރައްވާފަ އެވެ.
Advertisement
This content is created and paid for by advertisers and does not involve Voice Journalists
