ޔޫރޯ ކޮލިފައިން ގްރޫޕް ޖޭގައި އާދީއްތަ ދުވަހުގެ ރޭ އަމިއްލަ ދަނޑުގައި އައިސްލޭންޑާއި ދެކޮޅަށް ކުޅުނު މެޗު 2-0 ގެ ނަތީޖާއަކުން  އަތުން ކަމިޔާބުކޮށް ޕޯޗުގަލް އިން ޔޫރޯ24 ކޮލިފައިންގެ މެޗުތައް ނިންމާލީ ސަތޭކަ ޕަސެންޓް ރެކޯޑަކާ އެކުގައެވެ. އަދި މިއީ ޔޫރޯ ކޮލިފައިންގައި އެޓީމުން ހުރީހާ މެޗަކުން މޮޅުވި ފުރަތަމަ ފަހަރެވެ.

މިއާއެކު ޕޯޗުގަލް އިން ކޮލިފައިންގެ މެޗުތައް ނިންމާލީ ކުޅުނު 10 މެޗުން ވެސް މޮޅުވެ 30 ޕޮއިންޓާއެކު ގުރޫޕް ޖޭގެ އެއްވަނައިގައެވެ. އަދި އެޓީމު ކުޅުނު 10 މެޗުގެ ތެރެއިިން 9 މެޗުގައި ބައިކޮޅަށް ލަނޑެއް ވަނަނުދީ ހިފަހައްޓާލިއިރު، މި 10 މެޗުގައި އެޓީމުން ވަނީ 36 ލަނޑު ކާމިޔާބުކޮށްފައިވެއެވެ. އަދި އެޓީމުގެ ކޮޅަށް ވަދެފައިވަނީ އެންމެ ދެ ލަނޑެވެ. އަދި މިމެޗުން ބަލިވި އައިސްލޭންޑުން ކޮލިފައިންގެ މެޗުތައް ނިންމާލީ ކުޅުނު 10 މެޗުން ލިބުނު 10 ޕޮއިންޓާއެކު ގުރޫޕްގެ ހަތަރުވަނައިގައެވެ.

މިމެޗަށް ނުކުތްއިރު ވެސް އަންނަ އަހަރުގެ ޖަރުމަނުގައި އޮންނަ މުބާރަތުން ޖާގައެއް ޕޯޗުގަލް އިން ކަށަވަރުކޮށްފައިވާ އިރު، ރޭގެ މެޗުގެ ފުރަތަަމަ ހާފުގައި ޕޯޗުގަލް އިން ވަނީ ލަނޑުޖަހާނެ ގިނަ ފުރުސަތުތަކެއް ތަނަވަސްކޮށްފައެވެ.

ނަމަވެސް އެޓީމަށް ލިބުނު ގިނަ ފުރުސަތުތަކުގެ ބޭނުން ނުކުރެވި ދިޔައިރު، މިމެޗުގައި އެޓީމުން ލީޑު ހޯދީ ފުރަތަމަ ހާފުގެ 37 ވަނަ މިނެޓުގައެވެ. މިލަނޑު އެޓީމަށް ކާމިޔާބުކޮށްދިނީ މެންޗެސްޓާ ޔުނައިޓެޑްގެ މިޑްފީލްޑަރު ބްރޫނޯ ފެނާންޑޭޒް އެވެ. މިއީ އެޓީމުގެ މެންޗެސްޓާ ސިޓީގެ މިޑްފީލްޑަރު ބެނާޑޯ ސިލްވާ ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ. އަދި މިއީ މިފަހަރުގެ ޔޫރޯ ކޮލިފައިންގައި ކުޅުނު 10 މެޗުގައި އޭނާ ކާމިޔާބުކުރި 6 ވަނަ ލަނޑެވެ.

މިލަނޑާއެކު ފުރަތަމަ ހާފުގެ ކުޅުން ނިމިގެންދިޔައީ 1-0 ގެ ނަތީޖާއަކުން ޕޯޗުގަލް ކުރީގައި އޮވެގެންނެވެ.

މެޗުގެ ދެވަަނަ ހާފުގައި ވެސް ގިނަވަގުތު ބޯޅަ ހިފަހައްޓައިގެން ޕޯޗުގަލް އިން މެޗު ޑޮމިނޭޓުކުރި އިރު މި މެޗުގައި އެޓީމުން ކާމިޔާބުކުރި ދެވަނަ ލަނޑު ފަހުހާފުގެ 66 ވަނަ މިނެޓުގައި ކާމިޔާބުކޮށްދިނީ ދެވަނަ ހާފުގައި ބަދަލު ކުޅުންތެރިއެއްގެ ގޮތުގައި ކުޅެންނުކުތް ރިކާޑޯ ހޯޓާއެވެ. މިއީ އެޓީމުގެ ކެޕްޓަން ކްރިސްޓިއާނޯ ރޮނާލްޑޯ ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ. މިލަނޑާއެކު މެޗުގެ ކުޅުން ނިމިގެންދިޔައީ 2-0 ގެ ނަތީޖާއަކުން ޕޯޗުގަލް ކުރީގައި އޮވެގެންނެވެ.