ޕްރޮސެކިއުޓާ ޖެނެރަލް (ޕީޖީ) ހުސައިން ޝަމީމް އަށް ތުހުމަތު ކުރެވޭ ބޮޑެތި ކޮރަޕްޝަންގެ މައްސަލަ ތަކެއް އެންޓި ކޮރަޕްޝަން ކޮމިޝަން (އޭސީސީ)އަށް ހުށައަޅައިފިއެވެ.
މި މައްސަލަ އޭސީސީއަށް ހުށައަޅާފައި ވަނީ އާއްމު ފަރާތަކުންނެވެ. އޭސީސީ ގެ އިތުރުން މައްސަލަ ހުށައެޅި ފަރާތުން ވަނީ ރައްޔިތުންގެ މަޖިލީހާއި ރައީސް އޮފީހަށްވެސް މައްސަލަ ހުށައަޅާފައެވެ.
ޕީޖީ ޝަމީމަށް ކުރެވޭ ތުހުމަތު ތަކުގެ ތެރޭގައި މުއައްޒަފުންގެ މެދުގައި ތަފާތު ކުރުންތައް ގެންގުޅުމާއި ޕްރޮސެކިއުޓަރުންނަށް މައްސަލަތައް ބެހުމާއި، ޔުނިޓް ތަކަށް މުއައްޒަފުން ބެހުމާއި ޓްރެއިނިން އަށް މުއައްޒަފުން ނަގާއިރު ތަފާތު ކުރުންތައް ގެންގުޅޭކަމަށް ވަނީ ތުހުމަތު ކޮށްފައެވެ. އަދި މަގާމުގެ ނުފޫޒު ބޭނުންކޮށް އެއޮފީހަށް ހުށައެޅޭ މައްސަލަތަކަށް ދައުވާ ނުކުރުމަށް ނިންމާ ކަމަށްވެސް ދައުވާ ކުރާ ފަރާތުން ވަނީ ބުނެފައެވެ.
މި މައްސަލައިގައި ފާހަގަ ކުރައްވާފައިވާ އަނެއްކަމަކީ ސްޓަޑީ ޓުއާއެއްގެ ނަމުގައި ޝަމީމް އެންމެ ގަޔާވާ ޕްރޮސެކިއުޓަރުނަށް 18 ދުވަހަށް އެމެރިކާއަށް ފުރައި ވަޑައިގަތުމަށް ހަމަޖެހިފައިވާކަމަށާއި، އެ ޓުއާގައި ބައިވެރި ވެވަޑައިގަންނަވާ ޕްރޮސެކިއުޓަރުންނަކީ ފަރަހަނާޒް މުހައްމަދު ދީދީ އާއި ކާމިލް ހުސެން އާއި މަރިޔަމް ޝަހުމާ އާއި އައިމިނަތު ޝާމާ ނަސީރު އާއި ހުސެން ސާމީ އާއި އީނާ މޫސާ އާއި މުހައްމަދު އާލިމް އެވެ. މީގެ ތެރެއިން ފަރަހަނާޒް މުހައްމަދު ދީދީ އާއި ކާމިލް ހުސެން އަކީ ޝަމީމް ގެ އެދުމުގެ މަތިން ގާނޫނާއި ޕީޖީ އޮފީހުގައިވާ މަސައްކަތް ތަކުގައި އަމަލުކުރައްވަމުންދާ އުސޫލުތަކާއި ހިލާފަށް ކުރީގެ ޓުއަރިޒަމް މިނިސްޓަރު އަލީ ވަހީދުގެ މައްޗަށް ކުރެވުނު ޖިންސީ ފުރައްސާރައިގެ މައްސަލަ ފެއިލް ކޮށްލުމުގައި އުޅުނު ދެ ވަކީލުން ކަމަށް ވެސް މައްސަލައިގައި ވެއެވެ. މަރިޔަމް ޝަހުމާ އާއި އައިމިނަތު ޝާމާ ނަސީރު އާއި ހުސެން ސާމީ އާއި އީނާ މޫސާ އާއި މުހައްމަދު އާލިމް އަކީ އެމްއެމްޕީއާރުސީ ހިޔާނާތުގެ މައްސަލަތަކުގައި މަސައްކަތް ކުރައްވާ ވަކީލުންކަން ފާހަގަ ކޮށްލަން ޖެހެއެވެ.
ޝަމީމްގެ އިތުރުން ކާމިލް އަށް ކޮށްފައިވާ ތުހުމަތުތަކުގެ ތެރޭގައި އޭނާ އަކީ ޝަމީމުގެ ލޯ ފާމްގައި މަސައްކަތް ކުރި ޝަމީމް އާއި ޒާތީ ގުޅުމެއް އޮންނަ ފަރާތެއް ކަމަށާއި އޭނާ އަކީ ޕީޖީ ޝަމީމް، އަދީބުގެ ވަކީލެއްގެ ގޮތުގައި މަސައްކަތް ކުރެއްވި އިރު، އަދީބުގެ ފޯނު ޕީޖީ ޝަމީމް ގެ އިރުޝާދާއި އެއްގޮތަށް އިދާރާތަކަށް ފޮރުވުމުގެ މަސައްކަތް ކޮށަފައިވާ ބޭފުޅެއްކަމަށް ވެސް ބުނެފައިވެއެވެ.
މީގެ އިތުރުންވެސް ޕީޖީ ޝަމީމް އެ އޮފީހާއި ހަވާލުވި ފަހުން ދާއިރާ އާއި ގުޅޭ ބައްދަލުވުންތަކަށް ޓްރެއިނިން އަށް މުވައްޒަފުން ފޮނުވަން ޖެހުނު ނަމަވެސް އެ ޓްރެއިނިން ތަކަށް އެ އޮފީހުން ކަނޑައަޅުއްވައިފައިވާ ވަކީލަކީ ނިޝާން ވަހީދު ކަމަށް ވިދާޅުވެ ހުރިހާ ބައްދަލުވުންތަކަށް ނިޝާން ފޮނުއްވާކަމަށް ވެސް މައްސަލަ ހުށައެޅިފަރާތުން ވަނީ ބުނެފައެވެ. އަދި ނިޝާން އާއި ކުރުމަށް ހަވާލު ކޮށްފައިވާ މަސައްކަތް ތައް ނުކުރާކަމަށްވެސް ވަނީ ޝަކުވާ ކޮށްފައެވެ. އެހެންނަމަވެސް ނިޝާން ގެ ބަފައިބެ އަކީ އެމްޑީޕީގެ ބޭފުޅެއް ކަމުގައިވާ ބާރަށު ދާއިރާގެ މެމްބަރު އަހްމަދު އަބްދުالله ކަމަށް ވަތީ "ސަރުކާރު ރުއްސުމަށް" މިހާތަނަށް ނިޝާން އަށް އެއްވެސް ފިޔަވަޅެއް އަޅާފައި ނުވާކަންވެސް ވަނީ ފާހަގަ ކޮށްފައެވެ.
ދައުވާ ނުކޮށް ޝަމީމް ފައިލް ކުރަން ނިންމި ބައެއް މައްސަލަތަކުގެ ތެރޭގައި ވެންޓިލޭޓަރުގެ މައްސަލަ، ހިންނަވަރު ދާއިރާގެ މެމްބަރު ޖީހާން މަހްމޫދުގެ ފިރިމީހާގެ މައްޗަށް ކުރެވުނު ރޯޔަލް ރޭޕް ކޭސް ގެ ތުހުމަތު ގެ މައްސަލަ، ދުވާފަރު ދާއިރާގެ މެމްބަރު ގެ ހިޔާނާތުގެ މައްސަލަ، ހިއުމަން ޓްރެފިކިން ގެ ދައުވާ ކުރި މެމްބަރު ރިޒާގެ މައްސަލަ، ކުރީގެ ސްޕޯޓްސް މިނިސްޓަރ އަހްމަދު މަހްލޫފްގެ މައްޗަށް އެމްއެމްޕީއާރުސީ އާއި ގުޅިގެން ކުރި ދައުވާ މަސްތުވާ ތަކެތީގެ މައްސަލަތަކެއްގެ އިތުރުންވެސް ސަރުކާރުގެ އިސް މަގާމު ތަކުގައި ތިއްބެވި ބައެއް އިސްބޭފުޅުންގެ މައްސަލަތަކެއްވެސް ހިމެނޭ ކަމަށް އޭސީސީއަށް ހުށައަޅާފައިވެއެވެ.
މީގެ ކުރިންވެސް ޕީޖީ ޝަމީމު މުއައްޒަފުންގެ މެދުގައި ތަފާތު ކުރުން ގެންގުޅުއްވާ ކަމުގެ ވާހަކަ ފެތުރިފައިވާކަން ފާހަގަ ކޮށްލަން ޖެހެއެވެ.
މިކަންކަމުގެ އިތުރުންވެސް ޝަމީމް ދީނަށް ފުރައްސާރަ ކުރެއްވި ކަމަށާއި އެނޭންވެސް ބައިވަރު ސުލޫކީ މައްސަލަތަކެއް ޝަމީމްއާއި ދެކޮޅަށް ހުށައަޅާފައިވެއެވެ.
Advertisement
This content is created and paid for by advertisers and does not involve Voice Journalists
