މި އަހަރު ބޭއްވުނު ރިޔާސީ އިންތިޚާބުގެ ފުރަތަމަ ބުރާއި ދެވަނަ ބުރާއި ދެމެދު ދޫކުރެވުނު ފުލެޓްތައް އައު ސަރުކާރުން ރިވިއު ކުރަން ނިންމައިފިއެވެ. 

މިނިސްޓަރ އޮފް ހައުސިންގ، ލޭންޑް އެންޑް އަރބަން ޑިވެލޮޕްމަންޓް، ޑރ. ޢަލީ ހައިދަރު އަޙްމަދު މިއަދު ބޭއްވެވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން އެބޭފުޅާ ވިދާޅުވީ، ރިޔާސީ އިންތިޚާބުގެ ފުރަތަމަ ބުރުގެ ކުރިން، ކުރީގެ ރައީސް އިބްރާހިމް މުހައްމަދު ޞާލިހު ގެ ސަރުކާރުން ދޫކުރަން ނިންމި ފުލެޓް ތަކާއި، ފްލެޓްތަކުގެ ހައްގުވެރިންނަށް އެ ފްލެޓްތައް ދިނުމަކީ ރައީސުލްޖުމްހޫރިއްޔާ ޑރ މުހައްމަދު މުއިއްޒު ގެ ވަޢުދުފުޅެއް ކަމަށާ، އެ ފަރާތްތަކަށް ފުލެޓްތައް ލިބޭނެ ކަމަށެވެ. 

އެހެން ނަމަވެސް، އިންތިޚާބުގެ ފުރަތަމަ ބުރާއި ދެވަނަ ބުރާއި ދެމެދު ދޫކުރެވުނު ފުލެޓްތަކާއި ގުޅިގެން 700 އަށްވުރެ ގިނަ މައްސަލަ އޭސީސީއަށް ހުށަހެޅިފައިވާ ކަމަށާ، އެކަމާއި ގުޅިގެން ފުލެޓްތައް ދޫކުރުން ހުއްޓާލުމަށް ކުރީ ސަރުކާރަށް އޭސީސީން އަންގާފައިވާ ކަމަށް މިނިސްޓަރު ހައިދަރު ވިދާޅުވި އެވެ. 

Advertisement

މިއާއެކު، ރައީސް މުޢިއްޒު ރިޔާސީ އިންތިޚާބު ކާމިޔާބު ކުރެއްވުމަށްފަހު، ގޯއްޗާއި ފުލެޓް ދޫކުރުން މަޑު ޖައްސާލަން ކުރީ ސަރުކާރަށް އެންގެވިކަން ފާހަގަކުރައްވައި މިނިސްޓަރު އިތުރަށް ވިދާޅުވީ، ރައީސް މުޢިއްޒު އެފަދައިން އެންގެވިފަހުން ކުރީ ސަރުކާރުން ދޫކުރި ގޯތީގެ ލިސްޓާއި ފުލެޓް ލިސްޓަށްވެސް އައު ސަރުކާރުން ނުބަލާނެ ކަމަށެވެ.