އިޒްރާއިލް ސިފައިން ބަރު ހަތިޔާރާއި އެކު ފަަލަސްޠީނުގެ ޣައްޒާގައި ހުންނަ އިންދޮނީސީ ހޮސްޕިޓަލް ވަށައިލައިފިއެވެ.

އަލްޖަޒީރާގައި ބުނެފައިވަނީ އިޒްރާއިލް ސިފައިން ޣައްޒާގެ އިންދޮނީސީ ހޮސްޕިޓަލް ވަށައި ހަތިޔާރު ތަކާއި އެކު ވަށަލައިފައިވާކަމަށެވެ.

މަންޒަރު ފެންނަ ހިސާބުގައި ހުރި އަލްޖަޒީރާގެ ނޫސްވެރިޔަކާއި ހަވާލާދީ އަލްޖަޒީރާގައި ބުނެފައިވަނީ އިންދޮނީސީ ހޮސްޕިޓަލްގެ ހާލަތު ވަނީ ވަރަށް ބޮޑަށް ގޯސްވެފައިކަމަށެވެ.

“ބިރުގަނެފައިވާ ބަލިމިހުން ރައްކާތެރިކަން ހޯދަން ހޮސްޕިޓަލުގެ އެތެރޭގައި ދަނީ ހޭލަމޭލަވަމުން، ހަމަލާތަކުގެ އަމާޒަކަށްވި ބައެއް މީހުން ހޮސްޕިޓަލްގެ ތަޅުންމަތީގައި އެތަން މިތާގައި” އޭނާ ބުނެފައިވެއެވެ.

އިތުރަށް އޭނާ ބުނެފައިވަނީ އިޒްރާއިލް ސިފައިން ހޮސްޕިޓަލް ވަށައިލައިފައިވާ އިރު ހަރަކާތެއް ވާހެން ފެންނަ ކޮންމެ މީހަކު އެމީހުންގެ ހަމަލާ ތަކުގެ އަމާޒަކަށް ހަދަމުންދާ ކަމަށެވެ.

އިޒްރާއިލުން އިންދޮނީސީ އަށް ދެމުންދާ ހަމަލާތަކުގައި 12 މީހަކު ޝަހީދުވެފައިވާ ކަމަށް އަލްޖަޒީރާގައި ބުނެފައިވެއެވެ. އަލްޖަޒީރާގައި ބުނެފައިވަނީ އިންދޮނީސީ ހޮސްޕިޓަލްގެ ތެރޭގައި ޝަހީދު ވެފައި ތިބި މީހުންނަކީ އެ ހޮސްޕިޓަލްގައި ވަގުތީ ހިޔާވަހިކަން ހޯދަމުންދިޔަ ޢާންމުން ކަމަށެވެ.

އަދި އިޒްރާއިލުން ހަމަލާދީފައިވަނީ އިންދޮނީސީ ހޮސްޕިޓަލްގެ ސާޖިކަލް ޑިޕާޓްމެންޓަށް އަމާޒުކޮށް ކަމަށާއި އެ ހަމަލާގެ ސަބަބުން ބައެއް ޑޮކްޓަރުން ޒަޚަމް ވެފައިވާކަމަށެވެ.

އިޒްރާއިލުން ވަނި ޣައްޒާގެ އަލްޝިފާ ހޮސްޕިޓަލަށް ވަދެ ބޮޑެތި ގެއްލުން ތަކެއް ދިނުމަށް ފަހު އެތަން ހުސްކުރުމަށް އަންގައިފައެވެ.

އަލްޝިފާގެ ޑޮކްޓަރުން ދަނީ އެތަން ހުސްކުރުމަށް މަސައްކަތް ކުރަމުންނެވެ. އިއްޔެވަނީ އަލްޝިފާގެ އެންއައިސީޔޫގައި ތިބި “ޕްރިމެޗުއަރ” ކުދިން ޣައްޒާގެ ދެކުނުގައި ހުންނަ ދެހޮސްޕިޓަލަކަސް ބަދަލު ކޮށްފައެވެ.