ރައީސުލްޖުމްހޫރިއްޔާ ޑރ މުހައްމަދު މުއިއްޒު، ރިޔާސީ އިންތިހާބުގައި ވާދަކުރައްވަން ފެއްޓެވީވެސް، މާލެ ސަރަހައްދުގައި އެމަނިކުފާނުގެ ވެރިކަމުގައި ކުރިއަށް ގެންދަވާނެ ބޯހިޔާވަހިކަމުގެ މަޝްރޫޢުތައް ޕްލޭންކުރައްވައި، ކަރުދާހުގައި ކުރައްސަވާ ވެސް ނިންމަވާފައި ކަމަށް މިނިސްޓަރ އޮފް ހައުސިންގ، ލޭންޑް އެންޑް އަރބަން ޑިވެލޮޕްމަންޓް، ޑރ. ޢަލީ ހައިދަރު އަޙްމަދު ވިދާޅުވެއްޖެއެވެ.

މިއަދު ބޭއްވެވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން މިނިސްޓަރ ހައިދަރު ވިދާޅުވީ، މާލެ ސަރަހައްދުގައި ދިމާވެފައިވާ ބޯހިޔާވަހިކަމުގެ މައްސަލަ ހައްލު ކުރުމަށް ރައީސް މުޢިއްޒުގެ ސަރުކާރުން، ގިނަ ކަންކަން ރާވާފައިވާ ކަމަށެވެ. އެގޮތުން، ގުޅީ ފަޅާއި، ގިރާވަރު ފަޅާއި، މާލެ އާއި ހުޅުމާލޭގެ އިތުރުން ފުށިދިއްގަރު ފަޅުގައިވެސް މަޝްރޫޢުތައް ކުރިއަށް ގެންދަވަން ނިންމަވާފައިވާ ކަމަށް މިނިސްޓަރ ވިދާޅުވި އެވެ. 

މިނިސްޓަރ އިތުރަށް ވިދާޅުވީ، ކެންޕެއިންގެ ތެރެއިން، މާލެ ސަރަހައްދުގައި 60,000 ހައުސިންގ ޔުނިޓް އަޅުއްވާނެ ކަމަށް ރައީސް މުޢިއްޒު ވިދާޅުވެދެއްވާފައި ވީނަމަވެސް، މިހާރު އެ އަދަދު އެއަށްވުރެވެސް އިތުރު ވެގެން ގޮސްފައިވާ ކަމަށެވެ. 

އެގޮތުން، އެމަނިކުފާނުގެ ޕްލޭންގައި އޮތް ސަރަޙައްދުތަކުގެ އިތުރުން، ކުރީގެ ރައީސް އިބްރާހިމް މުހައްމަދު ޞާލިހު ގެ ސަރުކާރުން ހިއްކަންފެށި ހުޅުމާލޭ ފޭސް 3 ގެ ބިން ހިމަނައިގެން ޖުމުލަ 75,000 ހައުސިން ޔުނިޓް މާލެ ސަރަހައްދުގައި އެޅިގެންދާނެ ކަމަށް މިނިސްޓަރ ވިދާޅުވި އެވެ. 

މާލެ ސަރަހައްދުގެ ބޯހިޔާވަހިކަމުގެ ޕްލޭން ކަރުދާހުގައި ލިޔެވި ނިންމަވާފައިވާ ކަމަށް މިނިސްޓަރު ވިދާޅުވެފައިވާއިރު، އެކަމާއި ގުޅިގެން، ރައީސް މުޢިއްޒު ހުވާކުރެއްވި ރަސްމިއްޔާތު ގައި އެމަނިކުފާނު ވިދާޅުވީ، މި ދައުރު، ބިންވެރިކަމާއި ގެދޮރުވެރިކަމުގެ ރަންޒަމާނެއް ދިވެހީންނަށް ގެނެސްދޭނޭ ދައުރެއް ކަމަށެވެ. 

"އުތުރުތިލަފަޅުން ފެށިގެން ފުށިދިއްގަރު ފަޅާ ހަމައަށް، އެންމެ ޒަމާނީ އިމާރާތްތަކާއި ބަގީޗާތަކުގެ ހާރެއް އަތުރާލާނީ ތިޔަބޭފުޅުންގެ މި އާ ސަރުކާރުން. އެކަމުގެ ކަރުދާހީ ގިނަ މަސައްކަތެއް ހުރީ ލިޔެ، ހުރިހާ ކަމެއް ނިމިފައި. އިރާދަކުރެއްވިއްޔާ ވަރަށް އަވަހަށް، ޒަމާނީ އާ ޝަހަރުތަކެއްގެ ޒީނަތްތެރި މަލަތައް، ދިވެހި ފަޅުފަޅުން އުފުލިލާނެ." ރައީސުލްޖުމްހޫރިއްޔާ ޑރ މުހައްމަދު މުއިއްޒު ވިދާޅުވި އެވެ.