ރާއްޖެ އަންނަ އަދި ރާއްޖޭން ބޭރަށް ދަތުރުކުރާ ދިވެހި ރައްޔިތުން "އިމުގާ" ޓްރެވެލާ ޑިކްލެރޭޝަން ފޯމު ފުރިހަމަ ކުރަން ނުޖެހޭ ގޮތަށް މޯލްޑިވްސް އިމިގްރޭޝަނުން ނިންމައިފި އެވެ.

އިމިގްރޭޝަނުން މިއަދު ނެރުނު ނޫސްބާޔނުގައި ބުނެފައިވަނީ މި ނިންމުމަކީ ކޮންޓްރޯލަރ ޖެނެރަލް އޮފް އިމިގްރޭޝަން މުޙައްމަދު ޝަމްޢާން ވަޙީދު ރަސްމީކޮށް މިއަދު ވަޒީފާގެ މަސްއޫލިއްޔަތާއި ހަވާލުވެ ވަޑައިގެން ރައްޔިތުންނަށް ލުއިފަސޭހަ ޚިދުމަތެއް ފޯރުކޮށްދިނުމުގެ ގޮތުން ނިންމި ނިންމުމެއް ކަމަށެވެ.

އެގޮތުން،  އޭނާ މިނިންމެވުން ނިންމެވީ ދިވެހި ރައްޔިތުންނަށް ދަތުރުފަތުރު ކުރުމުގައި ވީހާވެސް ލުއިފަސޭހަ އިންތިޒާމެއް ހަމަޖައްސައި ދިނުމަށްޓަކައި ކަމަށާއި މިއަދުން ފެށިގެން 'ޓްރެވެލަރ ޑެކްލަރޭޝަން' ފޯމު ރާއްޖެ އަންނަ އަދި ރާއްޖެއިން ބޭރަށް ދަތުރުކުރާ ދިވެހިންނަށް ފުރިހަމަކުރަން ނުޖެހޭގޮތަށް ހަމަޖެހިފައިވާކަމަށް ނޫސް ބަޔާނުގައިވެއެވެ.

ދިވެހިންނަށް މި ފޯމު ފުރަން ނުޖެހޭ ގޮތަށް ހެދި ނަމަވެސް ބިދޭސީންނާއި ޓޫރިސްޓުން އަދިވެސް މި ފޯމު ފުރަން ޖެހޭނެ އެވެ.

އިމުގާ ފޯމަކީ ކޮވިޑް-19 އާ ގުޅިގެން ރާއްޖޭގެ ބޯޑަރުގެ ހިދުމަތް ހަރުދަނާކޮށް ރައްކާތެރިކުރުމުގެ ގޮތުން ޖުލައި 15، 2020 ގައި ތައާރަފް ކުރި ފޯމެކެވެ.