މިދިޔަ މަހު ރާއްޖެއަށް އެތެރެކުރި މުދާ އިތުރުވި ނަމަވެސް ދައުލަތަށް ލިބުނު އާމްދަނީ ދަށްވެއްޖެ ކަމަށް މޯލްޑިވްސް ކަސްޓަމްސް ގެ ތަފާސް ހިސާބުތަކުން ދައްކައިފިއެވެ.

ކަސްޓަމްސްގެ ތަފާސް ހިސާބުތައް ދައްކާގޮތުން މިދިޔަމަހު ދައުލަތަށް، ރާއްޖެއަށް އެތެރެކުރި މުދަލުން 5 ބިލިއަން ރުފިޔާގެ މުދަލުގެ ޑިއުޓީގެ ގޮތުގައި ލިބިފައިވަނީ 336 ބިލިއަން ރުފިޔާ އެވެ.

ނަމަވެސް މިދިޔަ އަހަރުގެ އޮކްޓޯބަރުގައި އެތެރެކުރި 4.2 ބިލިއަން ރުފިޔާގެ މުދަލުން ޑިއުޓީގެ ގޮތުގައި ވަނީ 364 މިލިއަން ރުފިޔާ ލިބިފަ އެވެ.

އޮކްޓޯބަރު މަހު ރާއްޖޭން އެކްސްޕޯޓް ކުރި މުދަލުގެ އެފްއޯބީ އަގު ވަނީ 2022 ވަނަ އަހަރުގެ މި މުއްދަތާއި އާޅާބަލާއިރު، 13 އިންސައްތަ ދަށްވެފައި ކަމަށް ކަސްޓަމްސްގެ ތަފާސްހިސާބު ތަކުން ދައްކައެވެ.

2022 ވަނަ އަހަރުގެ އޮކްޓޯބަރު މަހު ރާއްޖޭން 187 މިލިއަން ރުފިޔާގެ މުދާ ބޭރު ކޮށްފައި ވާއިރު، މިއަހަރު މިއަދަދު އުޅެނީ 163 މިލިއަން ރުފިޔާގަ އެވެ.

އޮކްޓޯބަރު މަހު ރާއްޖެއަށް އެތެރެ ކުރި މުދަލުގެ ސީއައިއެފް އަގު 2022 ވަނަ އަހަރުގެ އޮކްޓޯބަރު މަހާ އަޅާބަލާއިރު 17 އިންސައްތަ ވަނީ އިތުރުފަ އެވެ. 2022 ވަނަ އަހަރުގެ އޮކްޓޯބަރު މަހު ދިވެހިރާއްޖެއަށް 4.2 ބިލިއަން ރުފިޔާގެ މުދާ އެތެރެ ކޮށްފައިވާއިރު، މި ޢަދަދުވަނީ 5 ބިލިއަން ރުފިޔާ އަށް އިތުރުވެފަ އެވެ.

މިދިޔަ މަހު ރާއްޖެއަށް އެންމެ ގިނައިން މުދާ އެތެރެކޮށްފައިވާ ޤައުމުތަކުގެ ތެރޭގައި ހިމެނެނީ ޔޫ.އޭ.އީ، އިންޑިޔާ، ޗައިނާ، އޮމާން، އަދި މެލޭޝިއާ އެވެ. ޔޫ.އޭ.އީ އާއި އިންޑިޔާ އިން 732 މިލިއަން ރުފިޔާގެ މުދާ އެތެރެކޮށްފައިވާއިރު، ޗައިނާ އިން 716 މިލިއަން ރުފިޔާގެ މުދާ ވަނީ އެތެރެކޮށްފަ އެވެ.

މީގެއިތުރުން އޮމާން އިން 688 މިލިއަން ރުފިޔާގެ މުދާ ވަނީ އެތެރެކޮށްފަ އެވެ. މެލޭޝިއާ އިން 390 މިލިއަން ރުފިޔާގެ މުދާ ފާއިތުވި މަހު ވަނީ އެތެރެކޮށްފަ އެވެ.

މިދިޔަ މަހު އެންމެ ގިނައިން ރާއްޖޭން މުދާ ބޭރުކޮށްފައިވާ ޤައުމުތަކުގެ ތެރޭގައި ހިމެނެނީ، ތައިލޭންޑް، އިނގިރޭސިވިލާތް، ޖަރުމަނުވިލާތް، ފަރަންސޭސިވިލާތް އަދި ވިއެޓްނާމް އެވެ.