ކުރިއަށް އޮތް ދެ އަހަރުގެ ތެރޭގައި  މުޅި ރާއްޖެއަށް އިސްލާމީ ތަޢުލީމު ފުޅާކުރައްވާނެކަމަށް އިސްލާމިކް މިނިސްޓަރ ޑރ. މުޙައްމަދު ޝަހީމް ޢަލީ ސައީދު ވިދާޅުވެއްޖެއެވެ.

މިނިސްޓަރ މިފަދައިން ވިދާޅުވެފައި މިވަނީ މިއަދު އިސްލާމިކް ޔުނިވާސިޓީ އޮފް މޯލްޑިވްސް (އައިޔޫއެމް)ގެ ކެމްޕަސް ހިންގުމަށް ގދ. ތިނަދޫގައި ހުރި އިސްލާމީ މަރުކަޒު ހަވާލުކުރުމުގެ އެއްބަސްވުމުގައި ސޮއި ކުރުމުގެ ރަސްމިއްޔާތުގައި ވާހަކަފުޅު ދައްކަވަމުންނެވެ.

މި ރަސްމިއްޔާތުގައި ވާހަކަފުޅުދައްކަވަމުން މިނިސްޓަރ ޑރ.ޝަހީމް ވިދާޅުވީ ރާއްޖޭގެ އެކި ސަރަހައްދު ތަކުގައި އިސްލާމީ ކެމްޕަސް ތައް ހުޅުވާ، އިސްލާމީ ތައުލީމް ފުޅާކުރައްވާނެ ކަމަށެވެ.

Advertisement

"ކުރިއަށް އޮތް ދެ އަހަރު ތެރޭ މުޅި ރާއްޖެއަށް އައިޔޫއެމް ތަޢުލީމު ފުޅާވާނެ. އެކި ސަރަޙައްދުތަކުގައި އައިޔޫއެމް ބިނާތައް ޤާއިމުވާނެ. އުނގޫފާރު، ހިތަދޫ، ދިއްދޫ، ފުވައްމުލަކު މި ތަންތަނަށް އައިޔޫއެމް ކެމްޕަސްތައް އަންނާނެ." ވަޒީރު ޑރ ޝަހީމް ވިދާޅުވިއެވެ.

ދިހަ އަހަރަށް މި ކެމްޕަސް ހިންގުމަށް އެއްބަސްވެ މި އެއްބަސްވުމގައި އިސްލާމިކް މިނިސްޓްރީގެ ފަރާތުން ސޮއިކުރެއްވީ މިނިސްޓަރު ޝަހީމެވެ. އައިޔޫއެމްގެ ފަރާތުން ސޮއިކުރެއްވީ އެ ޔުނިވާސިޓީގެ ޗައިސް ޗާންސެލަރު އަލީ ޒާހިރެވެ.

ތިނަދޫގެ އިތުރުން ރ. އުނގޫފާރުގައި ވެސް އިސްލާމީ މަރުކަޒެއް އިސްލާމިކް މިނިސްޓްރީން ހިންގަމުން އަންނަކަން ފާހަގަ ކޮށްލެވެއެވެ.