ތިލަފުށީ ފަޅުތެރެ ހިއްކުމުގެ މަސައްކަތް ފެށުމަށްޓަކައި، އެތަނުގައި ހުރި އުޅަނދުތައް ނެގުމަށް އާބަންކޯއިން އަންގައިފިއެވެ.
އާބަންކޯއިން މިއަދު ނެރުނު އިޢްލާނެއްގައި ބުނީ ތިލަފުށީގެ މާސްޓަރ ޕްލޭނާ އެއްގޮތަށް ތިލަފުށި ތަރައްޤީކުރުމަކީ ރާއްޖޭގެ އިޤްތިޞާދާ ވަރަށް ބޮޑަށް ގުޅިފައިވާ ކަމެއް ކަމަށެވެ. އެހެންވެ، މާސްޓަރ ޕްލޭނާ އެއްގޮތަށް، ހިއްކަންޖެހޭ ތަންތަން އަވަސް މުއްދަތެއްގެ ތެރޭގައި ނިންމަން މަސައްކަތް ކުރަމުން އަންނަކަމަށް އެއިޢްލާނުގައި ބުނެފައިވެއެވެ.
ތިލަފުށީ ފަޅުތެރެއިން ހިއްކަން ހަމަޖެހިފައިވާ އޭރިއާ "އީ"ގެ މަސައްކަތް އަންނަ ޑިސެމްބަރު މަހުގެ 18ގައި ފަށަން އާބަންކޯއިން ވަނީ ނިންމާފައެވެ.
އެ ސަރަހައްދުގައި އެ ކުންފުނިން ކުރިއަށްގެންދިޔަ ސަރވޭގައި، ފަޅުތެރޭގައި އަޑިއަށްގޮސްފައިވާ އުޅަނދުތަކާއި ގިނަ މުއްދަތެއް ވަންދެން ބޭނުންނުކޮށް ހުރި އުޅަނދުތައް އަޅާފައިވާކަން ފާހަގަކުރެވިފައި ވާކަމަށް އެ ކުންފުނިން ބުނެފައިވެއެވެ.
ހިއްކުމަށް ހަމަޖެހިފައިވާ ސަރަހައްދުގެ ވަށައިގެން ހުރި ބިންތަކުގައި އުޅަނދުތައް މަރާމާތުކުރުމުގެ މަސައްކަތްވެސް ކުރަމުންދާކަމަށް އާބަންކޯއިން ބުނެފައިވެއެވެ. އެ ސަރަހައްދުގައި ހުރި ހުރިހާ އުޅަނދެއް ހަތް ދުވަހުގެ ތެރޭގައި ނެގުމަށް އެ ކުންފުނިން ވަނީ އަންގާފައެވެ.
ދީފައިވާ މުއްދަތުގެ ތެރޭގައި އުޅަނދުތައް ނުނަގައިފިނަމަ އެ ކުންފުނީގެ އުސޫލުގެ ދަށުން ޢަމަލު ކުރާނެކަމަށް އާބަންކޯއިން ބުނެފައިވެއެވެ.
Advertisement
This content is created and paid for by advertisers and does not involve Voice Journalists
