ދިވެހިރާއްޖެ އާއި ޔުނައިޓެޑް ޢަރަބް އެމިރޭޓްސް(ޔޫއޭއީ) އާއި ދެމެދު އޮތް ގާތް ގުޅުމަށް އައު ދައުރެއް ގެނައުމަށް އެޤައުމާއި ގުޅިގެން ސަރުކާރުން މަސައްކަތް ކުރައްވާނެ ކަމަށް ރައީސް ޑރ މުޙައްމަދު މުޢިއްޒު ވިދާޅުވެއްޖެއެވެ.

ރަައީސް ޑރ މުޢިއްޒު މިހެން ވިދާޅުވީ ޔޫއޭއީގެ 52 ވަނަ ޔޫނިއަން ޑޭ ގެ މުނާސަބަތުގައި ރޭ ބޭއްވެވި ހަފްލާގައި ވާހަކަފުޅު ދައްކަވަމުންނެވެ.

އެހަފްލާ ބާއްވައިފައިވަނީ މާލޭގައި ހުންނަ ހޮޓެލް ޖެންގައެވެ. މިރަސްމިއްޔާތުގައި ރައީސް ޑރ މުޢިއްޒުގެ އަރިހުގައި އެމަނިކުފާނުގެ އަނބިކަނބަލުންް ސާޖިދާ މުޙަމަދުވެސް ވަނީ ބައިވެރިވެވަޑައިގެންނެވިއެވެ.

Advertisement

އަދި މިހަފްލާގައި ނައިބު ރައީސް ޙުސެއިން މުޙައްމަދު ލަޠީފާއި ދައުލަތުގެ އިސްވެރިން ބައިވެރިވެ ވަޑައިގެންނެވިއެވެ.

ޔޫއޭއީގެ 52 ވަނަ ޔޫނިއަން ޑޭގެ މުނާސަބަތުގައި ބޭއްވި ރަސްމިއްޔާތުގައި ރައީސް ޑރ މުޢިއްޒު ދެއްކެވި ވާހަކަފުޅުގައި، ރައްޔިތުންގެ މެދުގައި އެއްބައިވަންތަކަން ވަރުގަދަކޮށް، އެއް އަމާޒަކަށް މަސައްކަތްކުރާ ބައެއްކަމަށް ވުމުން ހޯދޭ ކުރިއެރުންތައް، މީގެ 52 އަހަރު ކުރިން އެމިރޭޓްސްގައި ހިމެނޭ ޤައުމުތަކުން ގުޅުން ގާއިމުކޮށް ދެއްކި ނަމޫނާއިން ރަމްޒުކޮށްދޭކަމަށް ވިދާޅުވިއެވެ.

މިއާއިއެކު ޔޫއޭއީއަށް ވަރަށް ބޮޑު އިޖާދީ ބަދަލެއް އައިސްފައިވާކަން ފާހަގަކުރައްވައި، ރަސްމިއްޔާތުގެ އުފާވެރި މުނާސަބަތަކީ އެ ކާމިޔާބީތައްކަމަށް ފާހަގަކޮށް އެމަނިކުފާނު މަރުހަބާ ދެންނެވި އެވެ.

މި އަހަރަކީ ރާއްޖެއާއި ޔޫއޭއީ އާއި ދެމެދު ސިޔާސީ ގުޅުން ޤާއިމު ކުރިތާ 45 އަހަރު ފުރޭ އަހަރުކަމުގައި ވިދާޅުވެ، ވޭތުވެދިޔަ އަހަރުތަކުގައި ދެ ޤައުމުގެ ދެމެދުގައި ރަނގަޅު ގުޅުމެއް އުފެދިފައިވާކަމަށް ރައީސް ވިދާޅުވި އެވެ. އަދި ވެލާނާ އިންޓަރނޭޝަނަލް އެއަޕޯޓް ތަރައްޤީ ކުރުމުގެ މަޝްރޫއޫގެ މަސައްކަތް ނިންމުމަށްޓަކައި، ދާދިފަހުން އެ ޤައުމުން އިތުރު ފައިސާގެ އެހީ ފޯރުކޮށްދެއްވި ކަމީ، ދެ ޤައުމުގެ ގާތް ގުޅުމުގެ ހެއްކެއްކަން ރައީސް މުޢިއްޒު ފާހަގަކުރެއްވި އެވެ.