214 އެތްލީޓުންނާއި އެކު 32 ވަނަ ގައުމީ އެތުލެޓިކްސް މުބާރާތް މިއަދު ހެނދުނު ފަށައިފި އެވެ.
23 ނޮވެމްބަރު 2023 އިން 25 ނޮވެމްބަރު 2023 އަށް މާލޭ ސިޓީގެ ކުޅިވަރު އެކުވެނީ ޓްރެކް ދަނޑުގައި ކުރިއަށްދާ މިމުބާރާތުގައި މިއަހަރު ފިރިހެން 18 ޓީމު އަދި އަންހެން 15 ޓީމު ބައިވެރިވެފައި ވެއެވެ.
ދެ ދަންފަޅިއަކަށް ބަހާލައިގެން ކުރިއަށްގެންދާ މި މުބާރާތުގެ މިއަދުގެ ހެނދުނު ދަންފަޅީގައި ބޭއްވުނު އިވެންޓުތަކުގެ ތެރެއިިން ފިރިހެން ހައި ޖަމްޕް އިން އެއްވަނަ ދިވެހި ސިފައިންގެ ކުލަބުގެ ސުޒެއިން މުހައްމަދު ހޯދި އިރު މި އިވެންޓުން ދެވަނަ ހޯދީ ޓްރެކް އެންޑް ފީލްޑްގެ ޔޫސުފް ނައިކް އެވެ. އަދި މި އިވެންޓުން ތިންވަނަ ދެ އެތްލީޓަކަށް ވަނީ ލިބިފައެވެ. އެއީ ދިވެހި ސިފައިންގެ ކުލަބުގެ މުހައްމަދު ޖައިލަމް އަދި ބްލެކް މާލިންގެ މުހައްމަދު އިޔާމް ނާޒިމް އެވެ.
ފިރިހެނުންގެ ޓްރިޕަލް ޖަމްޕް އިން އެއްވަނަ ހޯދީ ކަސްޓަމް ރެކްރިއޭޝަން ކުލަބުގެ ނުޖޫމް ހަސަން އެވެ. އަދި ދެވަނަ ލިބުނީ ނަސީރު ސްޕޯޓްސްގެ އިބްރާހިމް ރާއިޝް އަބްދުލް އަޒީޒް އަށެވެ. އަދި މި އިވެންޓުން ތިންވަނަ ހޯދީ ސާއިދު ސްޕޯޓްސްގެ މުހައްމަދު ނާއިލް އެވެ.
އަންހެނުންގެ ޖެވެލިން އުކުމުން އެއްވަނަ ހޯދީ ކަސްޓަމް ރެކްރިއޭޝަން ކުލަބުގެ ލައުހާ ހުސެއިން އެވެ. މި އިވެންޓުން ދެވަނަ ލިބުނީ ޓްރެކް އެންޑް ފީލްޑްގެ ފާތުމަތު ފިރުޝާ އަބްދުﷲ އަށެވެ. އަދި ތިންވަނަ ހޯދީ ދަ ބްލެކް މާލިންގެ މިސްކާ މުހައްމަދު އިބުރާހިމް އެވެ.
އަންހެނުންގެ 5000 މީޓަރު ދުވުމުން އެއްވަނަ ހޯދީ އެލީޓް ރަނާސް ގެ ނިޒްމީނާ އަހުމަދު އެވެ. ދެވަނަ ހޯދީ ކުޑަ ހުސެއިން ސްޕޯޓްސްގެ ޝަލްޝަލް އެވެ. އަދި މިއިވެންޓުން ތިންވަނަ ހޯދީ ނަސީރު ސްޕޯޓްސްގެ މަރިޔަމް ނޫޔާން ނިޔާޒު އެވެ.
35 އަހަރުން މަތީގެ އަންހެން ލޯންގް ޖަމްޕް އިން އެއްވަނަ އެލީޓް ރަނާސްގެ މަރިޔަމް މަޔާން މުހައްމަދު ހޯދިއިރު، ދެވަނަ ހޯދީ އެކުލަބުގެ ހުސްނާ މުހައްމަދު އެވެ. އަދި ތިންވަނަ ލިބުނީ ކަސްޓަމްސް ރެކްރިއޭޝަން ކުލަބުގެ ހައްވާ ޒާހިރާ އަށެވެ.
Advertisement
This content is created and paid for by advertisers and does not involve Voice Journalists
