މިސްކިތް ފަންޑު ތަރައްގީކޮށް، ވަޤުފު އިމާރަތްތައް އިތުރުކުރެއްވުމަށް ރައީސުލްޖުމްހޫރިއްޔާ ޑރ މުހައްމަދު މުއިއްޒު ވެވަޑައިގެންފައިވާ ވައުދުފުޅާއި އެއްގޮތަށް، މިސްކިތް ފަންޑުގެ ދެވަނަ ވަޤުފު އިމާރާތުގެ ބިންގާ އަންނަ ޖަނަވަނީ މަހު އެޅިގެންދާނެ ކަމަށް އިސްލާމީ ކަންތައްތަކާއިބެހޭ ވުޒާރާގެ ވަޒީރު ޑރ. މުހައްމަދު ޝަހީމް ޢަލީ ސަޢީދު ވިދާޅުވެއްޖެއެވެ.
މިކަން އިއުލާން ކުރައްވައި ޝަހީމް ކުރެއްވި ޓްވީޓެއްގައި ވިދާޅުވީ، ރައީސް މުޢިއްޒުގެ ވަޢުދު ފުޅުތަކުގެ ތެރޭގައި، މިސްކިތް ފަންޑު ތަރައްގީކޮށް، ވަޤުފު އިމާރަތްތައް އިތުރުކޮށް، މިސްކިތު ފަންޑު ފުޅާ ކުރުމަށް ކަނޑައަޅުއްވާފައިވާ ކަމަށެވެ. އެހެންކަމުން، އެ ވައުދާއި އެއްގޮތަށް މިސްކިތް ފަންޑުގެ ދެވަނަ ވަޤުފު އިމާރާތުގެ ބިންގާ، އަންނަ ޖަނަވަނީ މަހު ހުޅުމާލޭގައި އެޅިގެންދާނެ ކަމަށް ޝަހީމް ވިދާޅުވި އެވެ.
ޝަހީމް އިތުރަށް ވިދާޅުވީ، މިހާރު ޤާއިމު ކުރެވިފައިވާ ވަޤުފު ފަންޑު އިމާރާތް ކަމަށްވާ ދާރުލްއީމާން އިން އަހަރު 6 މިލިއަނެއްހާ ރުފިޔާ ފަންޑަށް ވަންނަ ކަމަށެވެ. އަދި އެ ފައިސާ ޚަރަދުކުރަމުން ދަނީ މިސްކިތްތައް މަރާމާތުކުރުމާއި ޙާލަތު ރަނގަޅުކުރުމަށް ކަމަށް ޝަހީމް ވިދާޅުވި އެވެ.
ހުޅުމާލޭގައި ވަގުފް އިމާރާތެއް އެޅުމަށް ސަރުކާރުން ނިންމާފައިވާއިރު، ވަގުފް އިމާރާތް އިތުރު ކުރެއްވުމަށްޓަކައި ސިޓީ ތަކުގައިވެސް އެފަދަ އިމާރާތްތައް އެޅުމަށް މުޢިއްޒު ވަނީ ވަޢުދުވެވަޑައިގެންފައެވެ. އެގޮތުން ސިޓީތަކުގައި ވަގުފް ބިންތައް ކަނޑައަޅައި، އެ ބިމުގައި ސަރުކާރުގެ ހިދުމަތްދޭ އިދާރާތައް ގާއިމު ކުރުމަށް ވަނީ ކެންޕެއިންގެ ތެރެއިން ވަޢުދުވެވަޑައިގެންފައެވެ.
ރާއްޖޭގެ ފުރަތަމަ ވަގުފް އިމާރާތުގެ މަސައްކަތް ފަށާފައިވަނީ ކުރީގެ ރައީސް ޔާމީން އަބްދުލްގައްޔޫމްގެ ވެރިކަމުގައި، ޑރ. ޝަހީމް އިސްލާމިކް މިނިސްޓަރ ކަމުގައި ހުންނަވައިގެންނެވެ.
މާފަންނު މަދަރުސާއާއި ކުރީގެ ރާވެރިޔާ ރެސްޓޯރެންޓާއި ދެމެދު އޮންނަ ހުސް ބިމުގައި ދާރުލްއީމާންގެ ނަމުގައި ހަދާފައިވާ އެ އިމާރާތަކީ 10 ފަންގިފިލާގެ އިމާރާތެކެވެ.
Advertisement
This content is created and paid for by advertisers and does not involve Voice Journalists
