ފިލިޕީންސް އަށް ނިސްބަތްވާ ނަރުހެއް ކަމަށްވާ މޭރީ ގްރޭސް މަރާލި މައްސަލައިގައި ޖަލު ބަންދުގައި ހުރި ހަލީމަތް ލަމްހާ ތިން މަސްދުވަހަށް ކްރިމިނަލް ކޯޓުން އަމުރެއް ނެރެފިއެވެ.

މޭރީ މަރުގެ މައްސަލައިގައި ޖަލުގައި ހުރި ލަމްހާ ގޭބަންދަށް ބަދަލު ކުރުމަށް ކްރިމިނަލް ކޯޓުން އަމުރު ނެރެފައިވަނީ ޝަރުތުތަކެއް ކޮށްފައެވެ.

އެގޮތުން ކޮންމެ ދުވަހެއްގެ ރޭގަނޑު 10:00 އިން ހެނދުނު 6:00 އަށް ގެއިން ބޭރަށް ނުނުކުތުމަށާއި މާލޭން ބޭރަށްދާނަމަ ކޯޓުގެ ހުއްދަ ހޯދުމަށް ޝަރުތުކޮށްފައިވެއެވެ.

Advertisement

ނަރުސް މޭރީ ގްރޭސްގެ މަރުގެ މައްސަލައިގައި މޭރީ މަރާލިކަމުގެ ދައުވާ އުފުލައިފައިވަނީ މޭރީ އެކޭ އެއްފަދައިން އައިޖީއެމް ހޮސްޕިޓަލްގައި ނަރުހެއްގެ ގޮތުގައި މަސައްކަތް ކުރި އޭނާގެ ފިރިމީހާ މާވިން އެސްވައި ވާގަސްގެ މައްޗަށެވެ. އަދި އެކަމުގައި ބައިވެރިވި ކަމުގެ ދައުވާ އުފުލާފައިވަނީ ލަމްހާގެ މައްޗަށެވެ. ލަމްހާ އަކީވެސް އެހޮސްޕިޓަލްގައި ނަރުހެއްގެ ގޮތުގައި މަސައްކަތް ކުރި މީހެކެވެ.

2021 ވަނަ އަހަރުގެ އޮކްޓޫބަރު 19 ވަނަ ދުވަހު މޭރީ އަމިއްލައަށް ދަން ޖެހިގެން މަރުވި ކަމަށް ބުނެ މާވިން ފުލުހުންނަށް ރިޕޯޓް ކުރި ނަމަވެސް، އެކަމުގައި ޝައްކު ކުރެވޭ ކަންތައް ތަކެއް ހުރުމުން ފުލުހުން ވަނީ އެކަން އިތުރަށް ތަހްޤީޤު ކޮށްފައެވެ.

އެގޮތުން މޭރީގެ ހަށިގަނޑުގެ އެޓޮޕްސީ ހެދުމުން މޭރީ މަރާލައިފައިވަނީ ބޮލަށާއި ކަރަށް ހަމަލާދީ ނޭވާ ހާސްކޮށްލައިގެން ކަން ވަނީ އެނގިފައެވެ.

މޭރީގެ މަރުގެ މައްސަލައިގައި ބަންދުގައި ހުރި ލަމްހާގެ ވަކީލުންގެ ފަރާތުން ލަމްހާގެ ފައިގައި ޓެގް އެޅުވުމަސްފަހު ދޫކޮށްލުމަށް ވަނީ ކޯޓުގައި އެދިފައެވެ. ނަމަވެސް އޭރު ކޯޓުން ނިންމައިފައިވަނި ނިންމާފައިވަނީ ލަމްހާ ބަންދު ދެމެހެއްޓުމަށެވެ.

މޭރީގެ މަރުގެ މައްސަލައިގައި ލަމްހާ ހައްޔަރު ކުރީ އޭގެ 50 ދުވަސް ފަހުން އެ އަހަރުގެ ޑިސެމްބަރު 16 ގަ އެވެ.