ޕީޖީ އޮފީހުން އައްޑުއަތޮޅު ފޭދޫ މެޖިސްޓްރޭޓް ކޯޓުގެ ޙުރުމަތް ކެނޑިކަމަށަ ބުނާ މައްސަލަ އެ އޮފީހުން ހައިކޯޓުގެ ފަނޑިޔާރުންގެ މަޖިލީހަށް ހުށަހަޅައިފިއެވެ.
އައްޑުއަތޮޅު ފޭދޫ މެޖިސްޓްރޭޓް ކޯޓުގައި ހިނގަމުންދިޔަ މައްސަލައެއްގައި ހޯއްދަވަން، އެ ކޯޓުގެ މެޖިސްޓްރޭޓް އަމުރު ކުރެއްވި މަޢުލޫމާތު، އެކޯޓުން އެދިވަޑައިގެންނެވި ދުވަހަށް ފޮނުވިފައި ނުވާކަމަށް ބުނެ އެ ކޯޓުން ޕީޖީ އޮފީސް ޖޫރިމަނާކުރުމަށް ވަނީ ނިންމާފައެވެ.
އައްޑޫ ފޭދޫ މެޖިސްޓްރޭޓް ކޯޓުގެ އެ ނިންމުން މިމަހު 14 ގައި ޕީޖީން ވަނީ ދިވެހިރާއްޖޭގެ ހައިކޯޓުގައި އިސްތިއުނާފުކޮށްފަ އެވެ. އެހެންނަމަވެސް ހައި ކޯޓުން އެ މައްސަލަ ބަލައިނުގަތުމަށް 15 ނޮވެންބަރު 2023 ގައި ވަނީ ނިންމާފައެވެ.
ޕީޖީ އޮފީހުން މިއަދު ބުނީ، ހައިކޯޓުގެ އެ ނިންމެވުން މުރާޖަޢާ ކޮށްދެއްވުން އެދި 19 ނޮވެންބަރު 2023 ގައި ދިވެހިރާއްޖޭގެ ހައިކޯޓުގެ ފަނޑިޔާރުންގެ މަޖިލީހަށް ޕީޖީ އޮފީހުން އަލުން ހުށައަޅާފައިވާ ކަމަށެވެ.
ޕީޖީ އޮފީހުން މީގެ ކުރިން ބުނެފައިވާ ގޮތުގައި ފޭދޫ ކޯޓުގެ މެޖިސްޓްރޭޓް އެދިވަޑައިގެންނެވި ދުވަހަށް މައުލޫމާތު ފޮނުވިފައިނުވަނީ، އެ މަޢުލޫމާތަކީ އެ އޮފީހަށް މައްސަލައިގައި ލިބިފައިވާ މަޢުލޫމާތަކަށް ނުވާތީކަމަށެވެ. އަދި އެފަދަ މަޢުލޫމާތު ޕްރޮސިކިއުޝަން މެދުވެރިކޮށް ހޯދޭ ގޮތަށް އޮންނަ އިޖުރާއަތާ އެއްގޮތަށް ދިފާޢުން ހުށަހެޅުއްވުމުން އެ މަޢުލޫމާތު ހޯދުމަށް މަސައްކަތްކުރާނެކަމަށް ކޯޓުގައި ދެންނެވުމުން އެ ގޮތުގެ މަތިން އެފަދަ ހުށަހެޅުމެއް ލިބިފައި ނުވާތީ ކަމަށްވެސް ޕީޖީ އޮފީހުން ވަނީ ބުނެފައެވެ.
އޭގެ އިތުރުންވެސް ޕީޖީ އޮފީހުން ބުނީ މެޖިސްޓްރޭޓް ކޯޓުގައި ހިނގަމުންދިޔަ މައްސަލައއިގެ މައުލޫމާތަކީ ފުލުން ބަލަހައްޓަމުން ދިޔަ މައުލޫމާތެއް ކަމަށާއި އެ މައުލޫމާތު ލިބޭނީ ފުލުސް އޮފީހަަށް އަމުރެއް ފޮނުވައިގެން ކަމަށެވެ. އެ އަމުރު، ފުލުސް އޮފީހަށް ފޮނުވާފައި އޮތްކަމަށް ޕީޖީ އަށް މައުލޫމާތު ލިބިފައިވާކަމަށްވެސް ބުންޏެވެ.
ނަމަވެސް، އެ އޮފީހުގައި ނެތް މަޢުލޫމާތެއް، ކޯޓަށް ހުށަނާޅައިގެން ހިނގި ކަމެއްގައި، ދިވެހިރާއްޖޭގެ ކޯޓުތަކުގެ ޤާނޫނު ގައިވާ ޝަރީޢަތުގެ މަޖިލީހުގެ ނިޒާމާ ޚިލާފުވުމުގައި، އެމާއްދާގެ ދަށުން އަދަބެއް ކަނޑައެޅޭނީ "ޝަރީޢަތުގެ މަޖިލީސް ހިނގަމުންދަނިކޮށް" ހިނގާ ކަމެއްގައި ކަމަށް ސާފުކޮށް އޮއްވާ، މަޖިލީހުގެ ތެރޭގައި ނޫން ގޮތަކަށް ދިމާވި ކަމެއްގައި، އެމާއްދާގެ ދަށުން އަދަބު ކަނޑައެޅީތީ އެކަމާއި އެ އޮފީހުން ވަނީ ސުވާލު އުފައްދާފައެވެ.
Advertisement
This content is created and paid for by advertisers and does not involve Voice Journalists
