ކިންގްސް ކެޕިޓަލްސް ހޯލްޑިންގްސް ކުންފުނިން ދިވެހިރާއްޖޭގެ ގާނޫނާ ހިލާފަށް ޕޮންޒީ ސްކީމެއް ހިންގި ކަމުގެ ތުހުމަތުގައި މަޖިލީހުގެ ކުރީގެ މެމްބަރު އަލްހާން ފަހުމީ އާއި އޭނާގެ ދެ ކޮއްކޮ ކަމުގައިވާ މީޑިއާ ކައުންސިލުގެ ކުރީގެ ރައީސް ސަހުބާން ފަހުމީ އަދި ޝަޒުބާން ފަހުމީގެ މައްޗަށް ދައުވާކުރަން ދައުލަތުން ކްރިމިނަލް ކޯޓަށް ހުށައަޅައިފިއެވެ.

މިކަމާ ގުޅޭގޮތުން ޕީޖީ އޮފީހުން މިއަދު ބުނީ މި މައްސަލާގައި އަލްހާންގެ އިތުރުން އޭނާގެ ކޮއްކޮ ޝަހުބާން ފަހުމީ އާއި ޝަޒްބާން ފަހުމީގެ މައްޗަށް ޓެކުމުގެ 13 ދައުވާއެއް ކުރަން ފޮނުވާފައިވާ ކަމަށެވެ. އަދި މި މައްސަލައާ ގުޅިގެން މިހާތަނަށް އެކު ޖުމްލަ 39 (ތިރީސް ނުވައެއް) ދަޢުވާއެއް ކޮށްފައިވާނެ ކަމަށް ވެސް އެ އޮފީހުން ބުނެއެވެ. 

އިންވެސްޓަރުންނަށް މަންފާ ލިބޭނެ ކަމަށް ދައްކައިގެން ކިންގްސް ކުންފުނިން އާންމުންނަށް ހުޅުވާލައިގެން އިންވެސްޓްމަންޓް ސްކީމެއް ހިންގައި އެ ސްކީމަށް އެކި މީހުން 98 މިލިއަނަށްވުރެ ގިނަ ދިވެހި ރުފިޔާ ވަނީ އިންވެސްޓްކޮށްފައެވެ.

މިއަދު ދައުވާ އުފުލީ ފައިސާ އިންވެސްޓުކުރި މީހުންގެ ތެރެއިން 13 މީހުން މައްސަލަ ތަހުގީގު ކުރުމަށްފަހު, އެ 13 މީހުންގެ ބަޔަށެވެ.

ޕީޖީ އޮފީހުން އިތުރަށް ބުނީ މި މައްސަލައިގައި ގެއްލުން ލިބުނު އިތުރު މީހުންގެ މައްސަލަތަށް ފުލުހުން ތަހުގީގު ކުރަމުންދާ ކަމަށާއި ތަހުގީގުގެ މަރުހަލާ ނިމުމުން ދައުވާ ކުރާނެ ގޮތާއި މެދު ޕީޖީ އޮފީހުން ގޮތެއް ނިންމާނެކަމަށެވެ.

މީގެ ކުރިން ވަނީ  އަލްހާން, ސަހުބާން އަދި ޝަޒްބާންގެ އާއިލީ ކުންފުނި, ކިންގްސްގެ އެކައުންޓްތައް ވެސް ބޭންކުން ފްރީޒްކޮށްފައެވެ. ނަމަވެސް އެ މައްސަލައިގައި މިދިޔަ އަހަރު ސިވިލް ކޯޓުން ވަނީ އެ ކުންފުނީގެ އެކައުންޓްތައް ހިފެހެއްޓީ ގާނޫނާ ހިލާފަށް ކަމަށް ބުނެފައެވެ.