ވެރިކަމަށް ދަހިވެތި ވުމަކީ ޤިޔާމަތްދުވަހުން އެކަމަށްޓަކައި ހިތާމަކުރަންޖެހޭނެ ކަމެއް ކަމަށް އަހަރެމެންގެ ރަސޫލާ ޞައްލައްالله ޢަލައިހި ވަސައްލަމް ހަދީޘް ކުރައްވާފައިވާ ކަމަށް މިއަދުގެ ޚުތުބާގައި ބުނެފިއެވެ.
"އަމާނާތްތެރިކަމާއި މަސްއޫލިއްޔަތު" މައުލޫއަށް މިއަދު އިއްވި ޚުތުބާގައި ބުނީ، މީސްތަކުންގެ ކަންތައްތައް އިސްލާހުކޮށް ބެލެހެއްޓުމަށްޓަކައި މަސްއޫލވެރިއަކު ހުންނަންޖެހޭ ކަމަށެވެ. އެއީ މީހުންގެ ކަންތައްތައް އޮޅުންބޮޅުންވެ ފާލުން ނެއްޓިގެން ދިޔަ ނުދިޔުމަށްޓަކައި ކަމަށް ބުނެފައިވެއެވެ.
ކަންމިހެން ހުރި ނަމަވެސް މަސްއޫލުވެރިޔާ އޭނާގެ މަސްއޫލިއްޔަތު އަދާނުކޮށް، އޭނާގެ ޒާތީ މަސްލަޙަތު އިސްކޮށް، ނަހަމަގޮތުގައި އޭނާގެ މަގާމުގެ ބޭނުން ކޮށްފނަމަ، އޭނާ އެވަނީ އަމާނާތަށް ޚިޔާނާތްތެރިވެފައި ކަމަށް ޚުތުބާގައި ބުންޏެވެ.
މިއާއެކު ޚުތުބާގައި ބުނީ، ފަހު ޒަމާނުގައި މަސްއޫލިއްޔަތުތަކާ ޙަވާލުވާ ބައެއް މީހުންގެ ކިބައި، އެމީހުން ޙަވާލުވާ މަސްއޫލިއްޔަތު އަދާކުރުމުގެ ގާބިލުކަން ނުހުންނާނޭކަމަށް ކީރިތި ރަސޫލާ ޞައްލައްالله ޢަލައިހި ވަސައްލަމް ޚަބަރު ދެއްވާފައިވާކަމަށެވެ.
"މީހަކު ރަސޫލާ ޞައްލައްالله ޢަލައިހި ވަސައްލަމް އަށް ދެންނެވިއެވެ. ޤޔާމަތް ވާނީ ކޮންއިރަކުންތޯއެވެ؟ އެހިނދު ރަސޫލ ހަދީޘް ކުރެއްވިއެވެ. "އަމާނާތްތެރިކަން ނަގައިލެވިއްޖެނަމަ، ތިޔަބައިމީހުން ގިޔާމަތް ދުވަހަށް ތިމާ އިންތިޒާރު ކުރާށެވެ!" އޭނާ ދެންނެވޫއެވެ. މާތް اللهގެ ރަސޫލާއެވެ! އަމާނާތްތެރިކަން ނަގައިލެވޭނީ ކިހިނަކުން ހެއްޔެވެ؟ ހަދީޘް ކުރެއްވިއެވެ. "އެކަމުގެ ގާބިލުކަމާއި، އަހުލުވެރިން ނެތް މީހަކާ، ކަންކަން ޙަވާލު ކުރެވިއްޖެނަމަ، ތިބާ ގިޔާމަތަށް އިންތިޒާރު ކުރާށެވެ!"
ހުކުރު ޚުތުބާ
ބައެއް މީހުންނަށް މަސްއޫލިއްޔަތު ފަހުމްވާގޮތް އޮޅިފައިވާ ކަން ފާހަގަކޮށް ޚުތުބާގައި އިތުރަށް ބުނީ، އެމީހުން ދެކޭގޮތުގައި، މަސްއޫލިއްޔަތަކީ ފަހްރުވެތި ކަމާއި ޝަރަފުވެރި ކަން ކަމަށެވެ. އަދި އެއީ ތިމާގެ ބާރާއި މުއްސަނދިކަން ދެއްކުމަށް ހުޅުވޭ ދޮރެއް ކަމަށެވެ.
"އޭނާގެ އަމާޒަކީ ފިނި ކޮޓަރީގައި، ބިޔަ މޭޒު ދޮށުގައި، ބޮޑު ގޮނޑީގައި އިނދެ، ކަންކަމަށް އަމުރުކޮށް ކަންކަން މަނާކުރުމެވެ. މިވެނި މީހާ މިވެނި ވަޒީފާއަށް އެވެނި މީހާ، އެވެނި ވަޒީފާއަށް އިސްކުރުމެވެ." ޚުތުބާގައި ބުނެފައިވެއެވެ.
މަސްއޫލިއްޔަތާއި ގުޅިގެން ދެކެވިފައިވާ މިނުބައި މަފްހޫމުގެ ސަބަބުން މަސްއޫލިއްޔަތު ވަނީ ވާދަވެރިކަމުގެ ތެރެއަށް ވަދެފައި ކަމަށް ޚުތުބާގައި ބުންޏެވެ. އަދި އެހެންވަނު، އަމިއްލަ އެދުން ބޮޑުވުމާއި، އަގީދާ ބަލިކަށިވުމުގެ ސަބަބުން ކަމަށްވެސް ބުނެފައިވެއެވެ.
ޚުތުބާގައި އިތުރަށް ބުނީ މަސްއޫލިއްޔަތަކީ ބުރަ އަދި ބޮޑު ކަމެއް ކަމަށެވެ.
"ރަސޫލާ ޞައްލައްالله ޢަލައިހި ވަސައްލަމް ހަދީޘް ކުރެއްވިއެވެ. "ހަމަކަށަވަރުން ތިޔަބައިމީހުން ވެރިކަމަށް ދަހިވެތިވާނޫއެވެ. ޤިޔާމަތްދުވަހުން އެ ކަން ވާހުށީ ހިތާމައަކަށެވެ!"
ހުކުރު ޚުތުބާ
"އެހެނީ ވެރިކަމުގެ ޒިންމާ އަދާކޮށްފައިވާ ގޮތާމެދު، މާތް الله އޭނާއާ ސުވާލު ކުރައްވާނެތެވެ. އެކަމުގައި އިހުމާލު ވެފައިވާ މީހާއަށް، އެކަމުގެ ފާފަ ބަރުދާސްތު ކުރަން ޖެހޭނެއެވެ. މަސްއޫލިއްޔަތުގެ ޒިންމާ އަދާކުރިތޯއާ،، ޙައްގުތައް އަދާކުރިތޯއާއި، އަނިޔާލިބިފައިވާ މީހުންގެ ޙައްގުތައް ހޯދައިދީފައިވޭތޯ ސުވާލު ވެވޭނެއެވެ." ޚުތުބާގައި ބުނެފައިވެއެވެ.
ކަންމިހެން ހުރުމުން މަސްއޫލިއްޔަތަކީ ފަސޭހަކަމެއް ކަމަށް ނުދެކުމަށް ހުތުބާގައި ވަނީ ނަސޭހަތްތެރިވެފައެވެ. އަދި މަސްއޫލިއްޔަތަކީ ބޮޑު ޒިންމާއެއް ކަމުގައި ދެކެގެން، މާތް الله އެންގެވި ގޮތަށް އެ ޒިންމާ އަދާކުރުމަށް މަސައްކަތް ކުރުމަށް ޚުތުބާގައި ވަނީ އެދިފައެވެ.
Advertisement
This content is created and paid for by advertisers and does not involve Voice Journalists
