ތުރުކީވިލާތުގެ ރައީސް ރަޖަބް ޠައްޔިބް އުރްދުޣާންގެ ދަޢުވަތަށް ރައީސް ޑރ މުޙައްމަދު މުޢިއްޒު ތުރުކީވިލާތައް ވަޑައިގެންފިއެވެ.

ރައީސް ތުރުކީވިލާތައް ހެނދުނު ފެއްޓެވި ނަމަވެސް މިދަތުރުފުޅަކީ ފުރަމާނަ ދަތުރުފުޅެއް ނޫނެވެ. ރައީސް ޑރ މުޢިއްޒުގެ ފުރަތަމަ ފުރަމާނަ ދަތުރުފުޅު ކުރެއްވުމަށް ހަމަޖެހިފައިވަނީ ސަޢޫދީޢަރަބިއްޔާއަށެވެ.

ތުރުކީވިލާތަށް ކުރައްވާ މިޒިޔާރަތުގައި އެޤައުމުގެ ރައީސް އުރްދުޣާން އާއި ބައްދަލުކުރައްވައި ދެ ޤައުމުގެ މެދުގައި ބަައިލެޓްރަލް މަޝްވަރާތައް ބާއްވަވާ ދެ ޤައުމުގެ ގުޅުން އިތުރަށް ބަދަހި ކުރަން ކުރެވެން ހުރި ކަންކަމާބެހޭ ގޮތުން ހިޔާލު ބަދަލު ކުރައްވާނެ އެވެ.

Advertisement

އަދި މި ދަތުރުފުޅުގައި ރާއްޖޭގެ ވިޔަފާރި އާއި އިޤްތިޞާދު ފުޅާ ކުރުމަށާއި ތަރައްޤީ ކުރުމަށް ތުރުކީވިލަތަށް ވެދެވޭނެ އެހީތެރި ކަމާއި އެޤައުމުގެ އިޤްތިޞާދާއި ވިޔަފާރީގެ ތެރެއިން ރާއްޖޭގެ އިޤްތިޞާދުގެ ތެރެއަށް ގެނެވޭނެ އައު ފުރުސަތުތަކާ ބެހޭ ގޮތުން ވެސް ދެ ރައީސުންގެ ދެމެދުގައި މަޝްވަރާތައް ކުރެއްވުމަށް ވަނީ ހަމަޖެހިފައެވެ.

ތުރުކީވިލާތައް ކުރައްވާ ދަތުރުފުޅު ނިންމަވައިލެއްވުމަށްފަހު ދެން ވަޑައިގަތުމަށް ހަމެޖެހިފައިވަނީ އެކުވެރި ޢަރަބް ޢިމާރާތުގެ ދުބާއީއަށެވެ. ދުބާއީ އަށް ވަޑައިގަންނަވަނީ ދުބާއީގައި މިމަހު 30 ގައި ފަށާ ކޮޕް-28 ސަމިޓްގައި ބައިވެރިވެ ވަޑައިގަތުމަށެވެ. ޔުނައިޓެޑް ނޭޝަން ކްލައިމެޓް ޗޭންޖް ކޮންފަރެންސް - ކޮޕް28 - މި އަހަރު ޑުބާއީގައި ކުރިޔަށް ދާނީ ނޮވެމްބަރު 30 އިން ޑިސެންބަރު 12 އަށެވެ.

ރައީސް ތުރުކީވިލާތައް ފެއްޓެވި މިދަތުރުފުޅުގައި އެމަނިކުފާނުގެ އަރިހުގައި ފަސްޓުލޭޑީ ސާޖިދާ މުޙައްމަދު ވެސް ބައިވެރިވެވަޑައިގަންނަވައެވެ.