ޔޫތް އެމްޕަވަރމަންޓް، އިންފޮމޭޝަން އެންޑް އާޓްސް މިނިސްޓްރީގެ ޑެޕިޔުޓީ މިނިސްޓަރުކަމުގެ މަޤާމަށް ކުރިން މާލެ ސިޓީ ކައުންސިލްގެ މީޑިއާ އޮފިސަރުގެ މަޤާމުގައި ހުންނެވި މަލްޝާ ޝަރީފް މިއަދު އައްޔަނުކުރައްވައިފިއެވެ.

ޔޫތް މިނިސްޓްރީގެ ޑެޕިޔުޓީ މިނިސްޓަރުކަމާއި ހަވާލުވެވަޑައި ގަތުމަށް މަލްޝާ ވަނީ މާލެ ސިޓީ ކައުންސިލްގެ މީޑިއާ އޮފިސަރުކަމުން އިސްތިއުފާ ދެއްވައިފައެވެ.

މަލްޝާއަކީ ބިޒްނަސް މެނޭޖްމަންޓުގެ ދާއިރާއިން 2016 ވަނަ އަހަރު ޑިޕްލޮމާ ހާސިލް ކުރައްވައި، 2018 ވަނަ އަހަރު ބިޒްނަސް މެނޭޖްމަންޓް އެންޑް މާކެޓިންގެ ދާއިރާއިން ޑިގްރީ ހާސިލް ކުރައްވައިފައިވާ ބޭފުޅެކެވެ.

މަލްޝާ ވަނީ މީގެ ކުރިން ސިޓީ ކައުންސިލްގެ މީޑިއާ އޮފިސަރުގެ މަޤާމުގެ އިތުރުން ޕީއެސްއެމްގައި މާކެޓިން އެންޑް ސޯޝަލް މީޑިއާ އޮފިސަރެއްގެ ގޮތުގައި މަސައްކަތް ކުރައްވާފައެވެ.

ރިޔާސީ އިންތިޚާބުގެ ތެރޭގައި ރައީސް ޑރ މުޙައްމަދު މުޢިއްޒުގެ ކެމްޕޭނުގެ ތެރޭގައި ރައީސް މުޢިއްޒު އިންތިޚާބު ކުރެއްވުމަށް މަލްޝާ ވަނީ ބުރަ މަސައްކަތްތަކެއް ކުރައްވައިފައިވެއެވެ.