މާލެ ސިޓީ ކައުންސިލްގެ މީޑިއާ ޓީމުގައި ހަރަކާތްތެރިވި މަރިޔަމް ޝިއުނާ، މިނިސްޓްރީ އޮފް ޔޫތު އެމްޕަވާމެންޓް، އިންފޮމޭޝަން އެންޑް އާޓްސްގެ ޑެޕިއުޓީ މިނިސްޓަރުގެ މަގާަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު އައްޔަނު ކުރައްވައިފިއެވެ.

ޝިއުނާ މި މަގާމަށް އައްޔަނުކުރިކަން އަންގަވައި، ރައީސް އޮފީހުން މިއަދު ވަނީ ޝިއުނާއަށް ސިޓީއެއް ފޮނުވާފައެވެ. 

އެމަގާމަށް ޝިއުނާ އައްޔަންކުރުމާއި ގުޅިގެން ޝިއުނާވަނީ  މިއަދު މާލޭ ސިޓީ ކައުންސިލްގެ މީޑިއާ އެކްސެކެޓިވް ގެ  އިސްތިއުފާދެއްވާފައެވެ.

Advertisement

ސިޓީ ކައުންސިލްގެ މަގާމުގައި އުޅުއްވުމުގެ ކުރިން ޝިއުނާވަނީ ޓީވީ ޕްރެސެންޓަރެއްގެ އިތުރުން ނޫސްވެރިއެއްގެ ގޮތުގައި މަސައްކަތް ކޮށްފައެވެ. "ދިވެހި ޗެނަލް"ގައި ގިނަ ދުވަސްތަކެއް ވަންދެން ޚިދުމަތްކުރަައްވާފައިވާއިރު، އެކަމަނާ ވަނީ ސިޓީ ކައުންސިލްގެ ތަރުޖަމާނު ކަމުގައި ހުންނަވައިގެން ވެސް ބައެއް ނޫސްތަކަށް ފްރީލާންސްކޮށް ޚަބަރު ލިޔުއްވައިފައެވެ.

މީގެ އިތުރުންވެސް ރައީސް ޑރ.މުއިއްޒު ވަނީ މާލެ ސިޓީ ކައުންސިލްގެ މީޑިއާ ޓީމުގައި ހަރަކާތްތެރިވި މަލްޝާ ޝަރީފް ވެސް މިއަދު ވަނީ ހަމަ މިމަގާމަށް އައްޔަންކުރައްވާފައެވެ. މަލްޝާއަކީ ވެސް މާލެ ސިޓީ ކައުންސިލްގެ ވަޒީފާއާ ހަވާލުވެވަޑައިގަތުމުގެ ކުރިން، ޕީއެސްއެމްގައި މާކެޓިން އެންޑް ސޯޝަލް މީޑިއާ އޮފިސަރެއްގެ ގޮތުގައި މަސައްކަތް ކުރެއްވި ކަނބަލެއްކަން ފާހަގަ ކޮށްލަން ޖެހެއެވެ.