ރައީސް ޢަބްދުالله ޔާމިން ޢަބްދުލްޤައްޔޫމްގެ އިސްނެންގެވުމުގެ ދަށުން އުފައްދަ ޕީޕަލްސް ނޭޝަނަލް ފްރޮންޓް (ޕީއެންއެފް) އަށް ރައީސް ޔާމިން ސޮއިކުރައްވައިފިއެވެ.
އެމަނިކުފާނު އެޕާޓީއަށް ސޮއިކުރައްވައިފައިވަނީ ރޭގެ ވަގުތެއްގައި ކަމަށް އެޕާޓީ އުފެއްދެވުމުގައި އިސްކޮށް އުޅުއްވާ ބޭފުޅަކު “ވޮއިސް”އަށް މަޢުލޫމާތު ދެއްވައިފައިވެއެވެ.
ރައީސް ޔާމިންގެ އިތުރުން ބައެއް އާންމުންނާއި ސިޔާސީ މަޝްރަޙުން ފާހަގަކޮށްލެވޭ ބޭފުޅުންވެސް ވަނީ އެޕާޓީއަށް ސޮއިކުރައްވާފައެވެ.
ރައީސް ޔާމިން އެންމެ ފުރަތަމަ މަސައްކަތް ކުރެއްވީ އެމަނިކުފާނުގެ ބޭބޭފުޅު ރައީސް މައުމޫން ޢަބްދުލް ޤައްޔޫމް އާއި އެކު ޑީއާރްޕީ ގައެވެ. އަދި އެއަށްފަހު އަމިއްލަފުޅު ޕާޓީއެއް ޕީޕަލްސް އެލަޔަންސް ގެ ނަމުގައި އުފެއްދެވިއެވެ. އެެދެޕާޓީވެސް މިހާރުވަނީ ސިޔާސީ ޕާޓީ ތަކުގެ ރަޖިސްޓްރީ އިން އުނިކޮށްފައެވެ. އެއަށްފަހު ޕީޕީއެމްއާއި ގުޅިވަޑައިގެން ޕީޕީއެމްގައި މަސައްކަތް ކުރައްވައި އެޕާޓީގެ ޓިކެޓްގައި ވާދަކުރައްވައި ރާއްޖޭގެ ރައީސް ކަމަށް އިންތިޚާބުވެވަޑައިގެންފައި ވެއެވެ.
ރައީސް ޔާމިން ޕީޕީއެމް ދޫކުރައްވައި އައު ޕާޓީއެއް އުފެއްދެވުމުގެ މަސައްކަތް ކުރައްވަމުން މިގެންދަވަނީ ޕީޕީއެމް/ޕީއެންސީގެ ލީޑަޝިޕްގެ ބޭފުޅުން އެމަނިކުފާނުގެ މަޝްވަރާ ނުހޯއްދަވައި ބާކީ ކުރައްވާ ކަމުގެ ތުހުމަތުތައް ކުރެއްވުމަށް ފަހުގައެވެ.
Advertisement
This content is created and paid for by advertisers and does not involve Voice Journalists
