ކޮޕީރައިޓާއި އެއާގުޅޭ އެހެނިހެން ހައްގުތަކުގެ ގާނޫނަށް އިސްލާހު ގެނައުމުގެ ބިލެއް އެކުލަވައިލުމުގެ މަސައްކަތަށް ރައްޔިތުންގެ ހިޔާލު ހޯދުމަށް އިކޮނިމިކް މިނިސްޓަރީން ހުޅުވާލައިފި އެވެ.

މިކަމާއި ގުޅިގެން އިކޮނޮމިކް މިނިސްޓްރީން ނެރުނު އިއުލާނެއްގައި ވަނީ ފަންނުވެރިންނާއި އުފެއްދުންތެރިންގެ އުފެއްދުންތައް ޙިމާޔަތްކޮށް،އިހުނަށްވުރެ ފަހި މާހައުލެއް އެފަރާތްތަކަށް ކަށަވަރުކުރުމަށްޓަކައި މިހާރު ޢަމަލުކުރަމުންދާ ޤާނޫނަށް އިޞްލާޙުގެނައުމުގެ ބިލެއް އެކުލަވާލުމުގެ މަސައްކަތް އެ މިނިސްޓްރީއިން ކުރަމުންދާތީ އެ ޤާނޫނަށް  އެއްވެސް އިޞްލާޙެއް ގެނައުމަށް ބޭނުންވާނަމަ ނުވަތަ ޤާނޫނާ ގުޅޭގޮތުން ޚިޔާލެއްވާނަމަ،  އެކަމެއް މިނިސްޓްރީއަށް ހުށަހެޅުމުގެ ފުރުޞަތު ޢާންމުކޮށް ހުޅުވާލެވިފައިވާކަމަށެވެ.

މި ޤާނޫނާ ގުޅޭގޮތުން އާއްމުންގެ އެއްވެސް ފަރާތެއްގެ ޚިޔާލެއްވާނަމަ، 10 ޑިސެންބަރު 2023 ވާ އާދީއްތަ ދުވަހުގެ 14:00 ގެ ކުރިން މިނިސްޓްރީގެ ވެބްސައިޓަށް އޮންލައިންމެދުވެރިކޮށް ނުވަތަ ލިޔުމުން  މިނިސްޓްރީއަށް އެ ޚިޔާލެއް ފޮނުއްވައިދިނުމަށް ވަނީ އިކޮނޮމިކް މިނިސްޓްރީން އެދިފައެވެ.

ރާއްޖޭގެ ކޮޕީރައިޓާއި އެއާގުޅޭ އެހެނިހެން ހައްގުތައް ހިމާޔަތްކޮށްދީ، ދިވެހި ފަންނުވެރިންނާއި އުފެއްދުންތެރިންގެ އުފެއްދުންތައް ހިމާޔަތް ކުރުމަކީ ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ ހަފްތާ 14 ގެ މަގު ޗާޓުގައި ވެރިކަމުގެ ފުރަތަމަ 14 ހަފްތާގެ ތެރޭގައި ކުރުމަށް ކަނޑައަޅާފައިވާ ކަމެކެވެ.

ކޮޕީރައިޓާއި ގުޅޭ ގާނޫނެއް އެންމެ ފުރަތަމަ ފާސްކުރީ 2010 ވަނަ އަހަރު އޭރުގެ ރައީސް ނަޝީދު ވެރިކަމުގައި އެ އަހަރުގެ އޮކްޓޫބަރު މަހުއެވެ. އެ ގާނޫނުގައި ކޮޕީރައިޓާއި އެއާގުޅޭ އެހެނިހެން ހައްގުތައް ހިމާޔަތްކޮށްދިނުމާއި އެފަދަ ހައްގަކަށް އުނިކަމެއް ލިބިއްޖެނަމަ ކަނޑައަޅާނެ އަދަބުތައް ހިމަނާފައިވެ އެވެ.