ހައިވޭއިން ހުޅުމާލެއަށް އަރާ ހިސާބުގައި ކާރަކާއި ދެ ސައިކަލު ޖެހި ނުރައްކާތެރި އެކްސިޑެންޓެއް ހިނގައިފިއެވެ. 

މިއަދު 12:09 ހާއިރު އެކްސިޑެންޓެއް ހިނގައިގެން ފުލުހަށް ރިޕޯޓުކޮށްފައިވާ ކަމަށާއި މި އެކްސިޑެންޓް ގައި ދެ މީހަކަށް ސީރިއަސް އަނިޔާތަކެއް ލިބިފައިވާކަމަށް ފުލުހުން ވަނީ ބުނެފައެވެ. 

މި އެކްސިޑެންޓް ގައި ސައިކަލު ދުއްވި ދެމީހުނަށް މިހާރު ހުޅުމާލެ ހޮސްޕިޓަލްގައި އަންނަނީ ފަރުވާދެމުންނެވެ.

މި އެކްސިޑެންޓާއި ގުޅިގެން ބަލަންޖެހޭ ކަންކަން ފުލުހުން ބަލަމުން އަންނަކަމަށާއި, މި ކަމުގައި ހިމެނޭ ހުރިހާ އުނޅަދުތަކެއްވެސް ދުއްވާފައިވަނީ ލައިސަންސް އޮތް ފަރާތްތަކެއް ކަމަށްވެސް ފުލުހުން ބުންޏެވެ.

މިދިޔަ ހޯމަ ދުވަހުގެ ރޭ، ހުޅުމާލެ ސެންޓްރަލް ޕާކް ކައިރިވެސް ކާރަކާއި ތިން ސައިކަލެއް ޖެހި އެކްސިޑެންޓެއް ނުރައްކާތެރި އެކްސިޑެންޓެއް ވަނީ ހިނގާފައެވެ. މި އެކްސިޑެންޓްގައި 4 މީހަކަށް އަނިޔާވެފައި ވާއިރު މީގެ ތެރެއިން ދެ މީހަކަށް ވަނީ ބޮޑަށް އަނިޔާވެ، އެކަކަށް އައިސީޔޫގައި އަދި އަނެއް މީހާއަށް އެޗްޑީޔޫގައި ފަރުވާ ދެމުންދާ ކަމަށް އޭޑީކޭއިން ވަނީ ބުނެފައެވެ. 

މިފަހަކަށް އައިސް މާލެ ސަރަހައްދުގައި މިފަދަ ނުރައްކާތެރި އެކްސިޑެންޓުތައް ހިނގުން ވަނީ އިތުރުވެފައެވެ.