ގޭ ބަންދަށް ބަދަލުކުރައްވައިފައި ހުންނެވި ކުރީގެ ރައީސް ޔާމީން އަބްދުލްގައްޔޫމްޕީޕީއެމުން ވަކިވެ ވަޑައިގެން އުފައްދަވާ ޕީޕަލްސް ނެޝަނަލް ފްރަންޓް (ޕީއެންއެފް) އޮފީހަށް ރޭ ވަޑައިގެން، އެ މައްސަލަ ބަލަމުންދާ ކަމަށް މޯލްޑިވްސް ކަރެކްޝަނަލް ސަރވިސްއިން ބުނެފިއެވެ.

ކުރިން ޕީޕީއެމްގެ އޮފީސް ހިންގަމުން އައި ހ. ހުރަފާގޭގައި މިހާރު ހުރި ޕީއެންއެފް ގެ އޮފީހަށް ރައީސް ޔާމީން ވަޑައިގަތީ, ޕީއެންއެފް އުފެއްދުމަށް ބޭނުންވާ ފޯމް ފުރުން، އެ ގޭގެ ތިން ވަނަ ފަންގިފިލާގައި ކުރިއަށްދަނިކޮށެވެ.

މިކަމާއި ގުޅިގެން ވޮއިސްއަށް މައުލޫމާތު ދެއްވަމުން ކަރެކްޝަންގެ މީޑިޔާ އޮފިސަރ ވިދާޅުވީ އެ މައްސަލަ ކަރެކްޝަނުން ބެލުމަށްފަހު ފިޔަވަޅު އަޅަންޖެހޭނަމަ އެ ފިޔަވަޅެއް އަޅާނެކަމަށެވެ. 

Advertisement

ޖަލު ހުކުމެއްގައި ހުންނެވި ރައީސް ޔާމީން ޕީއެންއެފް އޮފީހުގައި ހުންނެވި ކަމަށް ވިދާޅުވެ، ކުރީގެ ސައެންސް މިނިސްޓަރު މުހައްމަދު މަލީހު ޖަމާލް ވަނީ ޓުވީޓާގައި ފޮޓޯއެއް ހިއްސާ ކުރައްވާފައެވެ.

އިންތިޚާބު ކާމިޔާބު ކުރުމަށް ރައީސް ޑރ މުހައްމަދު މުއިއްޒު ގެ އެދިވަޑައިގަތުމުގެ މަތިން ރައީސް ޔާމިން ވަނީ ގޭބަންދަށް ބަދަލުކުރައްވައިފައެވެ. އަދި ކަސްރަތު ކުރުންފަދަ ޚާއްސަ ކަންކަމަށް ގެކޮޅުން ބޭރަށް ވަޑައިގަތުމުގެ ހުއްދަދީ ރަށު ބަންދަށް ވަނީ ބަދަލު ކުރެވިފައެވެ.

އެހެން ނަމަވެސް ގެއިން ބޭރަށް ނިކުތުމަށް ލިބިވަޑައިގެން ހުއްދައިގެ ދަށުން ރައީސް ޔާމީން ވަނީ ސިޔާސީ ހަރަކާތްތައް ހިންގަވާފައެވެ. އެގޮތުން އެ މަނިކުފާނު މީގެ ކުރިން ޕީޕީއެމްގެ އޮފީހަށް ވަޑައިގެން، ޕާޓީގެ މެންބަރުންނާ ބައްދަލުކުރެއްވިއެވެ.

އެއާއެކު ކަރެކްޝަންސްއިން ވަނީ އެއްބަސްވުމާ ޚިލާފަށް އަމަލުތައް ތަކުރާރުކުރައްވާނަމަ އިގުރާރު ބަދަލުކުރާނެ ކަމުގެ އިންޒާރުވެސް އޭރު ދީފައެވެ.

ދިވެހި ރާއްޖޭގެ ޖަލުތަކާއި ޕެރޯލްގެ ގާނޫނު ބުނާގޮތުން ހުކުމް ތަންފީޒު ކުރަމުން އަންނަ ގައިދީންނަށް ސިޔާސީ ކަންކަމުގައި ބައިވެެރިއެއް ނުވެވޭނެއެވެ. އެހެންކަމުން ރައީސް ޔާމީން ގާނޫނަށް ތަބާނުވާ ކަމަށް ބުނެ ގިނަ ބަޔަކު އަންނަނީ އެމަނިކުފާނަށް  ފާޑުކިޔަމުންނެވެ.