އިހަވަންދިއްޕޮޅުގައި އިންޓަގްރޭޓެޑް ޑިވެލޮޕްމަންޓް ޕްރޮޖެކުޓް ކުރިއަށް ގެންދިއުމަށް ވަރަށް އަވަހަށް އިއުލާން ކުރައްވާނެ ކަމަށް، އިކޮނޮމިކް މިނިސްޓަރު މުޙައްމަދު ސައީދު މިއަދު ވިދާޅުވެއްޖެއެވެ.
މިނިސްޓަރ ކުރެއްވި ޓްވީޓެއްގައި ވިދާޅުވީ ރައީސް ޑރ މުއިއްޒުގެ ހަފްތާ 14 ގައި ހިމެނޭ ބައެއް މަސައްކަތުގެތެރެއިން، ލ.ގާދޫ ކައިރީގައި ތަރައްގީކުރާ ކޮމާޝަލްޕޯޓާއި، ލޮޖިސްޓިކްސް ހިމެނޭގޮތަށް އިހަވަންދިއްޕޮޅުގެ އިންޓަގްރޭޓެޑް ޑިވެލޮޕްމަންޓް ޕްރޮޖެކްޓް އަދި މާލޭ ކޮމާޝަލް ޕޯޓުގެ މަސައްކަތްތައް ކުރިއަށްދާނެކަމަށެވެ.
ރާއްޖޭގެ އެންމެ އުތުރުގައި އޮންނަ އިހަވަންދިއްޕޮޅަކީ ބޭރުގެ ގިނަ އަދަދެއްގެ އުޅަނދުތައް ދަތުރުކުރާ ސަރަހައްދެކެވެ.
ކުރީގެ ރައީސް ޔާމީންގެ ސަރުކާރުން "އައިހެވަން"ގެެ ނަމުގައި އިހަވަންދިއްޕޮޅުގައި އިންޓަގްރޭޓޭޑް ޕްރޮޖެކްޓެއް ހިންގަން ވަނީ އިއުލާނުކޮށްފައިެވެ. މި ޕްރޮޖެކްޓް ގެ ދަށުން ބަނދަރަކާއި އެއާޕޯޓަކާއި ބަންކަރިންގެ ޚިދުމަތާއި ޝޮޕިން މޯލްތަކުގެ އިތުރުން ރިއަލް އެސްޓޭޓާއި ޓޫރިސްޓު ރިސޯޓު ތަރައްގީކުރާ ގޮތަށް އޭރު ވަނީ ހަމަޖެހިފައެވެ. ނަމަވެސް އެމަނކުފާނުގެ ވެރިކަމުގެ ތެރޭގައި އެ މަޝްރޫއު ހިންގިފައެއް ނުވެއެވެ.
ހަމައެހެންމެ ނިމިދިޔަ ރިޔާސީ ދައުރުގައި ރައީސް އިބްރާހީމް މުޙައްމަދު ޞާލިހްގެ ސަރުކާރުން ވެސް އެ ޕްރޮޖެކްޓް ކުރިއަށް ގެންދާނެ ކަމަށް ބުނެ ތަފާތު ތާރީހުތައް ކަނޑައަޅައި އިއުލާން ކުރި ކަމުގައިވީނަމަވެސް އެ ޕްރޮޖެކްޓްގެ އަމަލީ އެއްވެސް މަސައްކަތެއް އެ ސަރުކާރުންވެސް ފަށާފައެއް ނުވެއެވެ.
މިފަދަ ޓްރާންޝިޕްމަންޓް ޕޯޓްތައް ހެދުން ފަދަ މަޝްރޫއުތަކަކީ ރާއްޖެ މިހާރު އޮތް ހާލަތު ބަދަލު ކުރުމަށް އިތުރު އާމްދަނީ ލިބޭނެ މަސައްކަތްތައް ކުރުމަށްޓަކައި ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވެވަޑައިގަތް ރިޔާސީ ވައުދުފުޅެކެވެ.
Advertisement
This content is created and paid for by advertisers and does not involve Voice Journalists
