ފާއިތުވި ސަރުކާރުގެ "ގެދޮރުވެރިޔާ" ސްކީމުގެ ދަށުން ދީފައިވާ ފްލެޓު ހަވާލު ކުރުން ހުއްޓުވުމުގެ ޤާނޫނީ ބާރު އެންޓި ކޮރަޕްޝަން ކޮމިޝަން (އޭސީސީ) އަށް ލިބިގެން ނުވާކަމުގައި ރައްޔިތުންގެ މަޖިލީހުގެ ގައުމީ ތަރައްގީ އާއި ތަރިކައިގެ ކޮމިޓީގެ މެމްބަރުކަން ކުރައްވާ ކެލާ ދާއިރާގެ މެމްބަރު އިބްރާހިމް ޝަރީފް ވިދާޅުވެއްޖެއެވެ. 

ގެދޮރުވެރިޔާ ސްކީމުގެ ދަށުން ދޫކޮށްފައިވާ ފްލެޓުތަކާއި ގުޅިގެން މި ސަރުކާރުން ނިންމާފައިވާ ކަންކަމާ ގުޅޭ މައުލޫމާތު ސާފުކުރުމަށް، ރައީސް ޑރ މުހައްމަދު މުއިއްޒުގެ ކެބިނެޓްގެ އައު ހައުސިން މިނިސްޓަރު ޑރ. އަލީ ހައިދަރު އަހުމަދު ހާޒިރުކޮށް މިއަދު ބޭއްވި ގައުމީ ތަރައްގީ އާއި ތަރިކައިގެ ކޮމިޓީ ބައްދަލުވުމުގައި ވާހަކަ ދައްކަވަމުން އިބްރާހިމް ޝަރީފް ވިދާޅުވީ، ސުޕްރީމް ކޯޓުގެ 2012/SEA/21 އިން އެނގޭ ގޮތުގައި ސަރުކާރުގެ މަސްއޫލިއްޔަތެއް އަދާކުރާ މިނިސްޓްރީއެއްގެ މެންޑޭޓެއްގެ ދަށުން ކުރަމުން ގެންދާ ކަމެއް ހުއްޓުވުމުގެ ބާރެއް އޭސީސީއަށް ލިބިގެން ނުވާކަމަށާއި އެހެން ނަމަވެސް އެ މައްސަލަ ބެލުމުގެ ކަންކަން އޭސީސީއަށް ކުރިއަށް ގެންދެވިދާނެކަމަށެވެ. 

"ގެދޮރުވެރިޔާ ސްކީމު"ގެ ނަމުގައި ކުރީ ސަރުކާރުން ހިންގި ފްލެޓު މަޝްރޫއުން ފްލެޓު ލިބޭ މީހުންގެ ދާއިމީ ލިސްޓު ނެރުމާއެކު، ސަރުކާރުން މަސައްކަތް ކުރަނީ އުސޫލުން ބޭރުން ކޮރަޕްޝަން އެކުލެވޭ ގޮތަށް ފްލެޓް ބަހައިލަން ކަމަށް ތުހުމަތުކޮށް އޭސީސީއަށް ބަޔަކު ވަނީ މައްސަލަ ހުށަހަޅައިފައެވެ. އަދި އެ މައްސަަލަތައް ހުށަހެޅުމާއެކު އޭސީސީން ވަނީ ފްލެޓު ދިނުން މަޑުޖައްސައިލުމަށް އަންގައިފައެވެ.

އެ މައްސަލާގައި އޭސީސީން ފުރަތަމަ އެންގީ ފްލެޓް ލިބޭ މީހުންގެ ލިސްޓަށް ޝަކުވާ ހުށަހަޅަން އެކަށީގެންވާ މުއްދަތެއް ދިނުމަށްފަހު މަޝްރޫއު ކުރިއަށް ގެންދިއުމަށެވެ. އެހެން ނަމަވެސް އިތުރަށް ބަލަންޖެހޭ ބެލުންތައް ބެލުމަށް ފަހު އެ ކޮމިޝަނުން ވަނީ ފްލެޓް ދިނުމުގެ މަސައްކަތްތައް އެއްކޮށް މަޑުޖައްސާލުމަށް އަންގައިފައެވެ. 

މިކަމާއި ގުޅިގެން މިނިސްޓަރ ވިދާޅުވީ، އޭސީސީގެ އެންގުމާ އެއްގޮތައް އެ މަަސައްކަތް ހުއްޓާލީ ކުރީ ސަރުކާރުން ކަމަށާއި މި ސަރުކާރުގެ ވިސްނުމަކީ އޭސީސީން އެފަދައިން އަންގާފައިވާތީ އެ އެންގުމަށް އިހުތިރާމުކުރުން ކަމަށެވެ.