މަސްވެރިންނަށް ނުދީ ހުރި 170 މިލިއަން ރުފިޔާ ހަމަޖެއްސުމަށް މިނިސްޓްރީ އޮފް ފިނޭންސް އާއި މިނިސްޓްރީ އޮފް ފިޝަރީޒް އެންޑް އޯޝަން ރިސޯސަސްގެ އިސް މުއައްސިސުން މަޝްވަރާކުރައްވައިފި އެވެ.

އެ މަޝްވަރާތަކާއި ގުޅޭ ތަފްސީލު ހާމަކުރުމަށް ފިނޭންސް މިނިސްޓްރީއިން އެކްސްގައި ކުރި ޕޯސްޓެއްގައި ބުނީ ސްޓްރީމްލައިން ޕްރޮސެސް ކުރުމާއި ކުރިއަށް އޮތްތަނުގައި މަސްވެރިކަމުގެ ސިނާއަތް މިހާރަށްވުރެ ބޮޑަށް ކުރިއަރުވައި ތަރައްގީ ކުރުމާއި ބެހޭގޮތުން މި ބައްދަލުވުމުގައި ހިޔާލު ބަދަލުކުރެވިފައި ވާނެކަމަށެވެ.

އެގޮތުން މި ބައްދަލުވުމުގައި މަސް ކިރުމަށްފަހު، މަސްވެރިންނަށް ނުދީ ހުރި ފައިސާ އެ މީހުންނަށް ފޯރުކޮށްދިނުން އަވަސްކުރުމަށް ފިޝަރީސް މިނިސްޓްރީން ވަނީ ފިނޭންސް މިނިސްޓްރީގައި އެދިފައެވެ. 

މީގެ އިތުރުން މަސްވެރިކަން ފުޅާކޮށް، މަސްވެރިކަން ކުރިއަށް ގެންދިއުމަށް ރާވާފައިވާ ހުރި ކަންކަމުގެ ތެރޭގައި މަސްވެރިން ބާނާމަސް ރައްކާ ކުރާނެ ސްޓޯރޭޖް ކެޕޭސިޓީ އިތުރު ކުރުމާއި އިތުރު އައިސް ޕްލާންޓްތަކެއް ބިނާ ކުރުމަށް ވެސް މަޝްވަރާކުރެވިފައި ވާ ކަމަށް ފިނޭންސްއިން ވަނީ ހާމަކޮށްފަ އެވެ.

ހަމައެއާއެކު، އެ މަސައްކަތްތައް ފެށި ކުރިއަށް އޮތް 18 ވަރަކަށް މަސްތެރޭ، ސްޓޯރޭޖް ކެޕޭސިޓީ ކުޑަވުމާއި، އެކަށީގެންވާ ވަރަށް އައިސް ޕްލާންޓުތަކުން ޚިދުމަތް ނުލިބޭ މައްސަލައަށް ޙައްލެއް ލިބިގެންދާނެ ކަމަށް ވެސް މިނިސްޓްރީން ވަނީ ބުނެފަ އެވެ. 

މިނިސްޓަރ އޮފް ފިޝަރީޒް އެންޑް އޯޝަން ރިސޯސަސްގެ މަގާމާއި ހަވާލުވެވަޑައިގަތުމަށް ފަހު، މި މަހުގެ 21 ވަނަ ދުވަހު މިނިސްޓަރު އަޙުމަދު ޝިޔާމް ވަނީ މިފްކޯގެ އިސްވެރިންނާއި ބައްދަލުކުރައްވާ މިފްކޯގެ މަސައްކަތްތަކާއި ގުޅޭ ތަފްސީލްތައް އޮޅުންފިލުއްވައި، މިފްކޯއިން ކުރިއަށްގެންދާ މަޝްރޫޢުތަކުގެ އެންމެ ފަހުގެ މައުލޫމާތުތައް ސާފުކުރައްވާފައެވެ. 

މަސްވެރިކަމުގެ ސިނާއަތަށް އިންގިލާބީ ބޮޑެތި ބަދަލުތަކެއް ގެނައުމަކީ ރައީސުލްޖުމްހޫރިއްޔާ ޑރ.މުއިއްޒުގެ ރިޔާސީ ވައުދުތަކުގެ ތެރޭގައި ހިމެނިވަޑައިގަންނަވާ ކަމަށް ވާއިރު، ވެރިކަމާއި ހަވާލުވެ ވަޑައިގަތުމަށް ފަހު މަސްވެރިކަމުގެ ސިޔާއަތު ކުރިއެރުވުމަށްޓަކައި އެންމެ އިސްކަންދީގެން ކުރައްވާނެ ގިނަ ކަންތައްތަކެއް ސަރުކާރުގެ ހަފްތާ-14 މަގުޗާޓުގައި ވެސް ވަނީ ހިމަނުއްވާފައި ވެއެވެ.

އޭގެ ތެރޭގައި ސްޓޯރޭޖް ކެޕޭސިޓީ އިތުރުކުރުމާއި، އައިސް ޕްލާންޓުތައް އޮޕަރޭޝަނަށް ގެނައުމުގެ އިތުރުން މަސްވެރިންގެ ދަފްތަރެއް އެކުލަވާލުމަށް ރަޖިސްޓްރޭޝަނަށް ހުޅުވާލުމާއި، ޗައިނާ ފަދަ ގައުމުތަކަށް ދިވެހި އުފެއްދުންތައް އެކްޕޯޓު ކުރުމަށް މާކެޓު ހޯދުމާއި، މަސްވެރިކަން ޕްރޮމޯޓުކުރާނެ އެޖެންސީ އެއް ޤާއިމްކޮށް، މިފްކޯގައި މަސްވެރިންގެ ދައުރު ފުޅާކުރުމުގެ މަސައްކަތްތައް ކުރިއަށް ގެންދިއުމަށް ވަނީ ނިންމަވާފަ އެވެ.