އިސްލާމީ ކަންކަމާއި ބެހޭ ވުޒާރަގެ ވަޒީރުގެ ނައިބަކަށް އަޙްސަން އިޙްސާން ހަމަޖައްސަވައިފި އެވެ.

ހދ. ވައިކަރަދޫ އަށް ނިސްބަތްވާ އަޙްސަން އަކީ ރާއްޖޭގެ ގިނަ ދީނީ ޢިލްމުވެރިން ތަކެއް އެކުވެގެން އުފައްދައިފައިވާ އިސްލާމިކް އޮގަނައިޒޭޝަން ފޯ ކަލްޗާ އެންޑް ސިވިލައިޒޭޝަން (އައިއޯސީސީ) ގެ މިހާރުގެ ރައީސެވެ. ކުރިން އެ ޖަމިއްޔާގެ ނައިބު ރައީސްކަން ވެސް އަޙްސަން ކުރައްވައިފައިވެ އެވެ.

އައިއޯސީ އަކީ މިހާރުގެ އިސްލާމިކް މިނިސްޓަރުގެ އިސްނެންގެވުމުގެ ދަށުން އުފައްދައިފައިވާ ޖަމުއިއްޔާއެކެވެ.

Advertisement

މި ޖަމުއިއްޔާގެ ކަންކަމުގައި އިސްކޮށް އުޅިއްވުމުގެ އިތުރުން އަޙްސަން އަކީ ނޫސްވެރިކަމުގެ ދާއިރާއިން ވެސް ފާހަގަކޮށްލެވޭ ބޭފުޅެކެވެ.

އެ ގޮތުން އޭނާ ވަނީ މޯލްޑިވްސް މީޑިއާ ކައުންސިލް (އެމްއެމްސީ) ގެ މެމްބަރުކަން ވެސް ކުރައްވައިފައި ވެއެވެ.

ރާއްޖޭގައި ދީނީ ކަންކަމަށް އާންމުން ހޭލުންތެރި ކުރުވާ އެފަދަ ހަރަކާތްތައް ހިންގާ ބައެއް ޖަމިއްޔާ ތަކުގައި އިސް ދައުރެއް އަހްސަން ވަނީ އަދާކުރައްވާފަ އެވެ.

މީގެ އިތުރުން މޯލްޑިވްސް ހައްޖު ކޯޕަރޭޝަންގައި މާކެޓިން އަދި އެ ކޯޕަރޭޝަންގެ މީޑިއާގައި ހަރަކާތްތެރިވެވަޑައިގެންފަ އެވެ.

ރައީސުލްޖުމްހޫރިއްޔާ ޑރ މުހައްމަދު މުޢިއްޒުގެ ސަރުކާރު އެކުލަވާލާ، އިސް މަޤާމުތަކަށް ބޭފުޅުން އައްޔަންކުރުމުގެ މަސައްކަތް ކުރައްވަމުން ގެންދަވާއިރު، ވުޒާރާތަކުން ވެސް އެ ވުޒާރާތަކުގެ މެންޑޭޓުގައި ހިމެނޭ ކަންކަން ތަންފީޒު ކުރުމަށް މަސައްކަތްތައް ކުރަމުންދާކަން ފާހަގަކޮށްލެވެ އެވެ.