ތުރުކީގައި ދިވެހި ރާއްޖޭގެ އެމްބަސީއެއް ހުޅުވުމުގެ މަސައްކަތް ކުރައްވާނެ ކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ. 

މިފަދައިން ރައީސް ޑރ.މުއިއްޒު ވިދޅުވީ އެމަނިކުފާނު މިހާރު ތުރުކީއަށް ކުރައްވަމުން ގެންދަވާ ރަސްމީ ދަތުރުފުޅުގައި ތުރުކީގައި ދިރިއުޅުއްވާ ދިވެހި ރައްޔިތުންނާއި ބައްދަލުކުރައްވައި ދެއްކެވި ވާހަކަފުޅުގައެވެ.

އެ ބައްދަލުވުމުގައި ތުރުކީގައި އުޅޭ ދިވެހިން ވަނީ ރާއްޖޭގެ އެމްބަސީއެއް ތުރުކީގައި ނެތުމުން ދިމާވާ އުނދަގޫތައް ރައީސް މުއިއްޒަށް ދަންނަވާފަ އެވެ.މިކަމާއި ގުޅިގެން ރައީސް ޑރ.މުއިއްޒު ވިދާޅުވީ ރާއްޖޭގެ އެމްބަސީއެއް ތުރުކީގައި ހުޅުވުމަށް ކުރަން ޖެހޭ މަސައްކަތްތައް ކުރުމަށް މަޝްވަރާ ކުރައްވާނެ ކަމަށެވެ.

Advertisement

އެމްބަސީގެ އިތުރުން ދެން ތުރުކީގައި ދިރިއުޅުއްވާ ދިވެހި ރައްޔިތުން ދެންނެވި އަނެއް ކަމަކީ އެ ގައުމުގައި ބޭންކް އޮފް މޯލްޑިވްސް (ބީއެމްއެލް) އެކައުންޓްތަކުން ފައިސާގެ ލިމިޓް މިހާރު އޮތް ގޮތުން ދިމާވާ ދަތިތަކަށް ހައްލު ހޯދައި ދެއްވުމެވެ. އެކަމަށް އިޝާރާތް ކުރައްވާ ރައީސް މުއިއްޒު ވިދާޅުވީ ގައުމީ ބޭންކާ އެކަމާ ގުޅޭ ގޮތުން މަޝްވަރާ ކުރައްވައި ހައްލެއް ހޯއްދަވައި ދެއްވާނެ ކަމަށެވެ.

މި ބައްދަލުކުރެއްވުމުގައި އެމަނިކުފާނު ވަނީ ތުރުކީގައި ދިރިއުޅެމުންދާ ދިވެހިން ބޭނުންވާ ކަންތައްތަކާއި އެފަރާތްތަކަށް ކުރިމަތިވާ ގޮންޖެހުންތައް ބައްލަވާ އެކަންކަމާ ގުޅޭގޮތުން މަޝްވަރާކުރައްވާފައެވެ.

އެމަނިކުފާނު ވަނީ އިއްޔެ ތުރުކީގެ ރައީސް ރަޖަބް ޠައްޔިބު އުރުދުޣާނާ ވެސް ބައްދަލުކުރައްވާފައެވެ.