“މަގޭ ސޯލާ” ޕްރޮގްރާމްގެ ސަބަބުން ކަރަންޓަށް ކުރާ ޚަރަދު ކުޑަވެގެންދަނާ ކަމަށް އެންވައިރަމެންޓް މިނިސްޓަރ ޠާރިޤް އިބްރާހިމް ވިދާޅުވެއްޖެއެވެ.

މިނިސްޓަރ ޠާރިޤް މިހެން ވިދާޅުވީ އަމިއްލަ މީހުންގެ ގޭގޭގައި ސޯލާ ޕެނަލް ހަރުކޮށް ކަރަންޓު އުފައްދާ ޕްރޮގްރާމް އިފްތިތާޙް ކުރައްވައި އެ ރަސްމިއްޔާތުގައި ވާހަކަދައްކަވަމުންނެވެ.

މިހަފްލާގައި މިނިސްޓަރު ޠާރިޤް ގެ އިތުުރުން ސަރުކާރުގެ ބައެއް އެހެން މިނިސްޓަރުންވެސް ވަނީ ބައިވެރިވެ ވަޑައިގެންފައެވެ.

އެންވައިރަމެންޓް މިނިސްޓްރީ އިން ބުނެފައިވަނީ މި ޕްރޮގްރާމްގެ އަމާޒަކީ ކަރަންޓު ބިލަށް ކުރާ ހޭދަ ކުޑަކުރުމާއި ތެލުން އުފައްދާ ހަކަތަ ބޭނުންކުރާ މިންވަރު މަދުކުރުން ކަމަށެވެ. އަދި މި ޕްރޮގްރާމް ހިންގުމަށް ރާވާފައި ވަނީ ސަރުކާރާއި ޔުޓިލިޓީ ކުންފުނިތަކާ އަދި ބޭރުގެ އެހީދޭ ފަރާތްތަކާ ގުޅިގެން ކަމަށެވެ.

މީގެއިތުރުން އިއްޔެ އިފްތިތާޙް ކޮށްފައިވަނީ މި ޕްރޮގްރާމްގެ ފުރަތަމަ ފިޔަވަހި ކަމަށާއި، މި ފިޔަވަހީގައި ސޯލާ ޕީވީން ކަރަންޓު އުފައްދާ ނިޒާމު ފޯރުކޮށްދިނުމަށް ހަމަޖެހިފައި ވަނީ ހަމައެކަނި ގޭބިސީތަކަށް ކަމަށްވެސް އެމިނިސްޓްރީ އިން ބުނެފައިވެއެވެ. އަދި މި ފިޔަވަހީގެ ދަށުން ޖުމްލަ ތިން މެގަވޮޓުގެ ސޯލާ ޕީވީ ނިޒާމުތައް ގޭބިސީތަކަށް ފޯރުކޮށްދެވޭނެ ކަމަށްވެސް އެމިނިސްޓްރީ އިން ވަނީ ބުނެފައެވެ.

“މަގޭ ސޯލާ” ޕްރޮގްރާމް އިފްތިތާޙް ކުރުމަށް ބޭއްވި ހަފްލާގައި ވާހަކަފުޅު ދައްކަވަމުން އެންވައިރަމެންޓް މިނިސްޓަރ ޠާރިޤް ވިދާޅުވެފައިވަނީ މި ޕްރޮގްރާމްގެ ފުރަތަމަ ފިޔަވަހީގެ ދަށުން ސޯލާ ޕީވީ ނިޒާމު ހަރުކުރަން ބޭނުންވާ މީހުންނަށް، ކަނޑައެޅިފައިވާ އުސޫލުގެ ތެރެއިން ޔުޓިލިޓީ ކުންފުނިތައް މެދުވެރިކޮށް، އިންސްޓޯލްމަންޓް އުސޫލުން ސޯލާ ޕީވީ ގަތުމުގެ އިންތިޒާމު ހަމަޖައްސައިދޭނެ ކަމަށެވެ. އަދި މި ނިޒާމުތައް ޤާއިމްކުރަނީ ނެޓް މީޓަރިންގެ އުސޫލުން ކަމަށް ވެސް އޭނާ ވިދާޅުވި އެވެ.

މި ސޯލާ ޕީވީ ނިޒާމުތައް ހަރުކުރާނީ ގޭގޭގެ ފުރާޅުގައި ކަމަށް ޠާރިޤް ވިދާޅުވިއެވެ.

ރާއްޖޭގައި ހަކަތަ އުފެއްދުމަށް ދައުލަތުން ވަރަށް ބޮޑު ހަރަދެއް ކުރަމުން އަންނަކަމަށާއި، ހަކަތަ އުފެއްދުމަށް ބޭނުންވާ ތެޔޮ ރާއްޖެ އަށް އެތެރެކުރުމަށް އަހަރަކު 800 މިލިއަން ޑޮލަރު ދައުލަތުން ހަރަދުކުރާ އިރު، ފިއުލް ސަބްސިޑީގެ ގޮތުގައި ވެސް އަހަރަކު 2.3 ބިލިއަން ރުފިޔާ ކުންފުނިތަކަށް ދޫކުރާ ކަމަށް މިނިސްޓަރ ޠާރިޤް ވިދާޅުވި އެވެ.

ރާއްޖެ ކުރިއަރައިގެން ދާއިރު، ހަކަތަ އަށް ހޭދަކުރާ މިންވަރު ކުޑަކުރުމަކީ ހުރިހާ އެންމެން ވެސް ކުރަން ޖެހޭ ކަމެއް ކަމަށް މިނިސްޓަރ ވިދާޅުވިއެވެ. އަދި އެއީ ހަކަތަ އަށް މި ބޭނުންކުރާ ފައިސާ ތަރައްޤީގެ އެހެން ކަމަކަށް ހަރަދުކުރެވޭ ނަމަ، މާ ރަނގަޅު ގޮތުގައި ބޭނުންކުރެވޭނެ ކަމަށްވެސް ޠާރިޤް ވިދާޅުވި އެވެ.

ގޭބިސީތަކުން ކަރަންޓަށް ކުރާ ހޭދަ ކުޑަކުރުމަށާއި ތެލުން އުފައްދާ ހަކަތަ ބޭނުންކުރާ މިންވަރު މަދުކުރުމަށް އަދި ސޯލާ ޕެނަލް ހަރުކުރުމުގެ ފަސޭހަ އިންތިޒާމުތައް ހަމަޖައްސައިދިނުމަކީ އާ ސަރުކާރުގެ "ހަފްތާ 14"ގައި ހިމެނޭ ކަމެކެވެ.