ރައީސުލްޖުމްހޫރިއްޔާ ޑރ.މުއިއްޒު ވައުދުވެވަޑައިގަތް ގޮތަށް ހިޔާ ފްލެޓް ހަދަން ހަރަދު ކުރި ފައިސާ، ހިޔާ ފްލެޓްގެ ވެރިންނަށް ލިބޭނެކަމުގެ ޔަގީންކަން އަރބަންކޯގެ މެނޭޖިންގ ޑައިރެކްޓަރ  އިބްރާހިމް ފަޒުލް ރަޝީދު އަރުވައިފިއެވެ.

ހިޔާ ފްލެޓް ގެ ފިނިޝިންއަށް ދޭން ވައުދުވި 200،000 ރުފިޔާ ނުދިނުމަށް ނިންމާފައިވާކަމަށް ބުނެ މީޑީއާތަކުން ފަތުރަމުން ދަނީ ހަގީގަތާއި ހިލާފު ހަބަރެއްކަމަށް ވިދާޅުވެ ފަޒުލް ވަނީ ޓްވީޓެއްވެސް ކޮށްފައެވެ.

ރިޔާސީ އިންތިހާބުގެ ދެވަނަ ބުރުގެ ކެމްޕެއިން ފެށުމަށް ހުޅުމާލޭ ހިޔާ ފްލެޓްތައް ހުރި ސަރަހައްދުގައި ސެޕްޓެމްބަރ 13 ވަނަ ދުވަހުގެރޭ ބޭއްވި ޖަލްސާގައި ވާހަކަ ދައްކަވަމުން ރައީސް ޑރ.މުއިއްޒު ވިދާޅުވެފައިވަނީ ކުރީގެ ރައީސް ޔާމީން އަބްދުލް ގައްޔޫމް ގެ ވެރިކަމުގައި އިމާރާތްތަކަށް މީހުން ވައްދަން ނިންމާފައި އޮތީ އިމާރާތް ފިނިޝިން ނިންމުމަށްފަހު ނަމަވެސް މި ސަރުކާރުން އެތަން ދިނީ ފިނިޝިން މަސައްކަތް ނުނިންމާ ކަމަށެވެ.

Advertisement

ނަތީޖާއެއްގެ ގޮތުން ހިޔާ ފްލެޓް ތަަކަށް ބަދަލުވީ މީހުން އަތުން ވަރަށް ބޮޑު ހަރަދެއް ގޮސްފައިވާ ކަމަށް ވިދާޅުވެ ރައީސް ޑރ.މުއިއްޒު ވަނީ އެމަނިކުފާނުގެ ވެރިކަމެއްގައި އެފައިސާ އަނބުރާ ދެއްވާނެ ކަމަށް ވައުދުވެވަޑައިގެންފައެވެ.