ކުރީގެ ރައީސް އަބްދުالله ޔާމީން އަބްދުލްގައްޔޫމް އިސްވެ ހުންނަވައިގެން އުފައްދަވާ އައު ޕާޓީ، ޕީޕަލްސް ނެޝަނަލް ފްރޮންޓް, ޕީއެންއެފް އުފައްދަން އިލެކްޝަންސް ކޮމިޝަނުން ހުއްދަދީފިއެވެ.
ރައީސް ޔާމީންގެ އައު ޕާޓީގެ މުއައްސިސަކީ އެމަނިކުފާނުގެ ދަރިކަލުން ޒޭން އަބްދުالله ޔާމީނެވެ.
ޔާމީންގެ ޕާޓީ އުފެއްދުމުގައި އިސްކޮށް ހަރަކާތްތެރިވެވަޑައިގަންނަވާ ކުރީގެ ޓެކްނޮލޮޖީ މިނިސްޓަރ މުހައްމަދު މަލީހު ޖަމާލް ވިދާޅުވެފައިވާ ގޮތުގައި، މިހާރުވެސް އެ ޕާޓީއަށް މެންބަރުން ވައްދަން ފޯމު ފުރުމުގެ މަސައްކަތް ވަނީ ފެށިފައެވެ. އަދި އެ ޕާޓީގެ އަމާޒަކީ 24 ގަޑި އިރުތެރޭގައި 3000 މެންބަރުން ހަމަކޮށް ފޯމުތައް އީސީއަށް ހުށަހެޅުން ކަމަށްވެސް މަލީހު ވިދާޅުވި އެވެ. އެގޮތުން ޕީއެންއެފް ވާނީ އެ ރާއްޖޭގައި ސިޔާސީ ޕާޓީއެއް އުފެއްދުމުގެ ރިކޯޑް މުގުރާލާ ޕާޓީއެއް ކަމަށް އޭނާ ވިދާޅުވި އެވެ.
މީގެ އިތުރުން، ކުރިއަށް އޮތް މާލެސިޓީ ގެ މޭޔަރ ހޮވުމަށް ބާއްވާ އިންތިޚާބާއި އަންނަ އަހަރު ބާއްވާ މަޖިލީހުގެ އިންތިޚާބުގައިވެސް އެ ޕާޓީން ވާދަ ކުރާނެ ކަމަށް މަލީހު ވަނީ ވިދާޅުވެފަ އެވެ.
ޕީޕީއެމް/ ޕީއެންސީގެ ލީޑަރޝިޕްގެ ބައެއް ބޭފުޅުން ރައީސް ޔާމީން އާއި ދުރަށް ޖެހިވަޑައިގެން، ކަންކަމުގައި އެމަނިކުފާނުގެ މަޝްވަރާ ނުހޯއްދަވައި ނިންމެވުންތައް ނިންމަވަމުންދާ ކަމަށް އެމަނިކުފާނަށް ދެކެވޭތީ ކަމަށް ވިދާޅުވެ، ރައީސް ޔާމީން އެ ޕާޓީން ވަކިވެވަޑައިގެން އައު ޕާޓީއެއް އުފައްދަވާފައި ވާއިރު، ޕީޕީއެމް ޕީއެންސީގައި ތިއްބެވި އެމާނިކުފާނުގެ ސަޕޯޓަރުން އެޕާޓީއާ ގުޅުމަށް ޔާމީން ވަނީ އެދިވަޑައިގެންފަ އެވެ.
Advertisement
This content is created and paid for by advertisers and does not involve Voice Journalists
