ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ)ގެ ބޯޑުގެ މެމްބަރުކަމަށް އައްޔަނުކުރިތާ ތިން ދުވަސް ނުވަނީސް ހަސަން މުގުނީ އެ މަގާމުން ވަކިކޮށްފި އެވެ.

ޕީސީބީން އެކްސްގައި ކުރި ޕޯސްޓެއްގައި، މި ހަފުތާގެ އާދިއްތަ ދުވަހު ރައީސް ޑރ.މުއިއްޒު ޕީސީބީގެ ބޯޑު އަލުން އެކުލަވައިލައްވާފައިވާ ކަމަށް ބަޔާންކޮށް ހިއްސާކުރި އާ ލިސްޓުގައި މުގުނީގެ ނަމެއް ނެތެވެ.

ސްޓެލްކޯގެ ކުރީގެ މެނޭޖިން ޑިރެކްޓަރު އަދި ތިމާވެއްޓާ ބެހޭ މިނިސްޓްރީގެ ސްޓޭޓް މިނިސްޓަރު ކަމުގައިވެސް އުޅުއްވި މުގުނީ އެ މަގާމުން ވަކިކުރި ސަބަބު އަދި ހާމަކޮށްފައެއް ނުވެއެވެ.

Advertisement

ހަތް މެމްބަރުން ތިބޭ ޕީސީބީގެ ބޯޑު މެމްބަރު ކަމަށް އޭނާ އައްޔަންކޮށްފައިވަނީ ރައީސުލްޖުމްހޫރިއްޔާ ޑރ. މުހައްމަދު މުއިއްޒެވެ.

ޕީސީބީގައި ތިބޭނީ ރައީސް އާއި ނައިބު ރައީސް ގެ އިތުރުން އެކައުންޓިން އެންޑް ފައިނޭންސް ދާއިރާ، ބޭންކިން ދާއިރާ، ބިޒްނަސް އެޑްމިނިސްޓްރޭޝަން ދާއިރާ، އިކޮނޮމިސްކް ދާއިރާ، އަދި ގާނޫނީ ދާއިރާ ހިމެނޭހެން ކޮންމެ ދާއިރާއަކަށް ވެސް މެމްބަރެކެވެ.

ޕީސީބީ އަކީ ސަރުކާރު ހިއްސާވާ ކުންފުނިތަކަށް ޑިރެކްޓަރުން އައްޔަންކުރާ ބޯޑެވެ. އެތަނުގެ އިދާރީ ކަންކަން ކުރިއަށްގެންދާނީ މިނިސްޓްރީ އޮފް ފިނޭންސުންނެވެ.