އެފްކޮންސް ކުންފުނީގެ މައްޗަށް އެންވަޔަރމަންޓް މިނިސްޓްރީން ކޮށްފައިވާ 69 މިލިއަން ރުފިޔާގެ ޖޫރިމަނާ ފަސްކުރުމުގެ އަމުރެއް ނެރެދެވެން ނެތް ކަމަށް ސިވިލް ކޯޓުން އިއްޔެ ނިންމައިފި އެވެ.
ސިވިލް ކޯޓުން ނިންމި ނިންމުމުގައިވަނީ އެކަމަކީ ވަގުތުން ފިޔަވަޅު އަޅަންޖެހޭ ފަދަ ކަމެއްކަން ބުނެދެވިފައިނުވާ ކަމަށެވެ. އަދި ޖޫރިމަނާ ނުދެއްކިއްޖެ ނަމަ އެއްބަސްވުން ބާތިލްކޮށް، އެ ކުންފުނީގެ މާލީ ހާލަތަށް އަސަރު ކުރާނެ ކަމަށް ބުންޏަސް އެކަން ދިމާވާނެ ގޮތެއް ބުނެދެވިފައިނުވާ ކަމަށް އެ ނިންމުމުގައިވެ އެވެ.
މިދިޔަ އަހަރުގެ އޯގަސްޓް މަހުގެ 16 ވަނަ ދުވަހު ތިލަ މާލެ ބްރިޖްގެ މަސައްކަތުގައި ހަރަކާތްތެރިވި އެފްކޮންސް ކުންފުނީގެ ބާޖެއް ވިލިމާލެ ފަރަށް އަރައި އެފަރަށް ލިބުނު ގެއްލުމުގެ ބަދަލުގައި އެ އެންވަޔަރމަންޓް މިނިސްޓްރީން ވަނީ އެފްކޮންސް ކުންފުނި 69 މިލިޔަން ރުފިޔާއިން ޖޫރިމަނާކޮށްފައެވެ.
އެންވަޔަރަންމަންޓަލް ޕްރޮޓެކްޝަން އެޖެންސީ (އީޕީއޭ) އިން ވިލިމާލެ ފަރު ބަލައި ސާވޭކުރުމަށްފަހު އެފްކޮންސް ކުންފުނި ޖޫރިމަނާކުރީ މިދިޔަ އަހަރުގެ ނޮވެމްބަރު 13 ވަނަ ދުވަހު އެވެ. އެފްކޮންސް އިން މިމައްސަލަ ކުރީގެ އެންވަޔަރަންމަންޓް މިނިސްޓަރު އައިމިނަތު ޝައުނާއަށް ހުށަހަޅައި އިސްތިއުނާފް ކުރީ މިދިޔަ އަހަރުގެ ޑިސެމްބަރު ހަތްވަނަ ދުވަހު އެެވެ.
Advertisement
This content is created and paid for by advertisers and does not involve Voice Journalists
