އެމްއޭސީއެލްގެ އައު މެނޭޖިން ޑިރެކްޓަރު އިބްރާޙިމް ޝަރީފް މުހައްމަދު އެއަރޕޯޓުގެ ހާލަތު ދެނެގަތުމަށް ސައިޓު ވިސިޓެއްކުރައްވައިފިއެވެ.

އެމްއޭސީއެލްގެ މެނޭޖިން ޑިރެކްޓަރ ގެ މަގާމަށް ޝަރީފް ޢައްޔަނު ކުރެވުނީ، މި މަހުގެ 28 ވަނަ ދުވަހުއެވެ. 

މަގާމަށް އައްޔަނު ކުރެވުމާއި އެކު، މަސައްކަތްތަކާއި ހަވާލުވެވަޑައިގެން އެންމެ ފުރަތަމަ ދުވަހު އެމްޑީ ޝަރީފް އެއަރޕޯޓުގައި ބިނާކޮށްފައިވާ ވަސީލަތްތައް ހުރި ސަރަހައްދު ތަކަށް ޒިޔާރަތްކުރައްވާ މަސައްކަތްތައް ބައްލަވާލާފައިވާ ކަމަށް އެމްއޭސީއެލް އިން ވަނީ ބުނެފައެވެ.

Advertisement

އެގޮތުން އައު ޕެސެންޖާރ ޓާމިނަލްގެ މަސައްކަތާއި، އައު ފިއުލް ފާމާއި އެނޫންވެސް ހިންގަމުންދާ މަސައްކަތްތައް ބައްލަވާލައްވާފައިވާ ކަމަށް އެ ކުންފުނިން ބުނެފައިވެއެވެ.

އެމްއޭސީއެލްގެ އައު އެމްޑީގެ ޝަރީފަކީ، ދައުލަތުގެ ޚިދުމަތުގައި 36 އަހަރު ހޭދަކުރައްވާފަައިވާ ބޭފުޅެކެވެ. މި ވީ 36 އަހަރުތެރޭގައި ޝަރީފުވަނީ ސަރުކާރުގެ އެކި އިސް މަގާމުތައް ފުރުއްވާފައެވެ.

އެގޮތުން، ކޮމިޝަނަރ ޖެނެރަލް އޮފް ކަސްޓަމްސްގެ މަގާމާއި، ޓްރާންސްޕޯޓް އޮތޯރިޓީގެ ޗެއާމަން ކަމާއި، ފިޔުލް ސަޕްލައިސް މޯލްޑިވްސް ގެ ޗެއާމަން ކަމާއި، މޯލްޑިވްސް ގޭސްގެ ޗެއާމަން ކަމާއި އެލައިޑް އިންޝުއަރެންސްގެ ޗެއާމަންކަންވެސް އެބޭފުޅާ ވަނީ ކުރައްވާފައެވެ. 

މީގެ އިތުރުން އެމްޕީއެލްގެ ސީއީއޯ ކަމުގެ މަގާމާއި، އެސްޓީއޯގެ ބޯޑް އޮފް ޑިރެކްޓަރ ގެ މަގާމުވެސް ޝަރީފް ވަނީ ފުރުއްވާފައެވެ. 

އެންމެ ފަހުން އަދާކުރެއްވީ އޮސްޓްރޭލިއާގައި ހުންނަ ރާއްޖޭގެ ޓްރޭޑް ރެޕްރެޒެންޓޭޓިވްގެއެއްގެ މަގާމެވެ. ޝަރީފްއަކީ ކޮމާސްގެ ދާއިރާއިން މާސްޓާޒް ހާސިލުކުރައްވާފައިވާ މީހެކެވެ.