ޤިޞާޞްގެ ޙުކުމަށް ހުރަސް އެޅޭ ގޮތަށް އޮތް ޤާނޫނުލް އުޤޫބާތުގެ މާއްދާއެއް ސްޕްރީމް ކޯޓުން ބާޠިލް ކޮށްފިއެވެ.

ސްޕްރީމް ކޯޓުން މިއަދު ބާޠިލް ކޮށްފައިވަނީ ޤާނޫނުލްއުޤޫބާތުގެ 1204 ވަނަ މާއްދާގެ ނ. ގެ ދެ ވަނަ ނަންބަރު މާއްދާއެވެ. ސްޕްރީމް ކޯޓުން މިއަދު އެޙުކުމް ބާޠީލް ކޮށް ކުރި ޙުކުމްގައި ބުނެފައިވަނީ އެ މާއްދާ އަކީ އިސްލާމީ ޝަރީޢަތުގައި ކަނޑައަޅާފައިވާ ޤިޞާޞް ގެ ޙުކުމް ކަނޑައެޅުމަށް ހުރަސް އެޅޭ ގޮތަށް ކަމަށެވެ.

ސުޕްރީމް ކޯޓުން އެ ގޮތަށް ކަނޑައަޅައި ޙުކުމް ކުރީ، މީގެ 11 އަހަރު ކުރިން ވެސްޓް ޕާކް ރެސްޓޯރަންޓް ކައިރީގައި މ. ފެއާރީނޯ އަލީ ޝިފާން ހުއްޓައި އޭނާއަށް ހަމަލާދީ މަރާލި މައްސަލާގައި ތުހުމަތު ކުރެވޭ މުހައްމަދު ޝައިފަން މަރަން ހައި ކޯޓުން ކުރި ޙުކުމުގެ އިސްތިއުނާފު ޝަރީއަތުގެ ޙުކުމް އިއްވަމުންނެވެ.

ޤާނޫނުއުލްއުޤޫބާތުގެ 1204 ވަނަ މާއްދާގެ ނ. ގެ ދެވަނަ ނަންބަރުގައި ބުނަނީ ދައުވާ ރައްދުވާ ފަރާތުގެ ބަޔާން ހިމެނޭ ގޮތުގެ މަތިން ކުށެއް ސާބިތު ކުރުމަށް ހުށަހަޅާ އެއްވެސް ހެއްކެއްގެ ބަޔާނެއް ނުވަތަ އެ ބަޔާނުން އެއްވެސް މިންވަރެއް އެ ކުށް ސާބިތު ކުރުމަށް ހުށަހަޅާ އެހެން ހެއްކެއްގެ ބަޔާނަކާއި އެއްވެސް މިންވަރަށް ފުށުއަރާ ނަމަ އެއްވެސް ޝައްކެއް ނެތް މިންވަރަށް ކުށް ސާބިތުވި ކަމަށް ނުބެލެވޭނެ ކަމަށެވެ.

އެ މާއްދާ ބާތިލް ކަމަށް ތާއީދުކުރައްވަމުން ފަނޑިޔާރު ހުސްނުއްސުޢޫދު ވިދާޅުވީ އެއް ތަނެއްގެ މަންޒަރު ފެނުނު ބަޔަކު ކަމަށް ވިޔަސް، ކޮންމެ މީހަކަށް ވެސް މަންޒަރު ފެންނާނީ އެކި ދިމަދިމާއިން އެކި ނިސްބަތަށް ކަމަށެވެ. އެކި މީހުންނަށް ފެނުމާއި ދެނެގަތުމުގެ ޤާބިލުކަން ވެސް ލިބިފައިވަނީ އެކި ވަރަށް ކަން ފަނޑިޔާރު ފާހަގަ ކުރެއްވި އެވެ.

ފަނޑިޔާރު ސުޢޫދުގެ ރައުޔުގައި ވަނީ ހެކިބަހުގައި ކުޑަ ކަމެއް އުނިވެގެން މުޅި ހެކިބަސް ނަފީ ނުކުރެވޭ ކަމަށެވެ. އަދި އެއީ އެއްވެސް ޝައްކެއް ނެތް މިންވަރަށް ނުވަތަ އެއްވެސް ޝުބުހެއް ނެތް މިންވަރަށް ކުށެއް ސާބިތު ނުވާން ޖެހޭ ސަބަބެއް ވެސް ނޫން ކަމަށް ފަނޑިޔާރު ސުޢޫދުގެ ރައުޔުގައި ފާހަގަ ކުރެއްވި އެވެ.

މި މައްސަލައިގެ ފަނޑިޔާރުންގެ ބެންޗުގައި ތިއްބެވީ ފަނޑިޔާރު ހުސްނުއް ސުޢޫދާއި، އަޒްމިރާލްދާ ޒާހިރު، އާއިޝާ ޝުޖޫން މުޙައްމަދު، މަހާޒް ޢަލީ ޒާހިރު އަދި ރިޔާސަތު ބެލެހެއްޓެވި އަޙްމަދު މުއްތަސިމް އަދްނާނެވެ.

އުއްތަމަ ފަނޑިޔާރު މުުއުތަސިމް އަދުނާނާއި ފަނޑިޔާރު ހުސްނުއްސުއޫދުގެ ރައުޔައަށް ފަނޑިޔާރު އަޒްމިރަލްދާ ޒާހިރާއި ފަނޑިޔާރު މަހާޒު އަލީ ޒާހިރު ތާއީދު ކުރެއްވި އެވެ.

ރައުޔު ތަފާތުވީ ފަނޑިޔާރު އައިޝާ ޝުޖޫންގެ އެވެ. އިސްލާމީ ޝަރީއަތުގައިވާ ހަމަތަކުގެ މަތީން ޤިޞާޞް ހިފަން ކަނޑައެޅޭ ވަރަށް ކުށް ސާބިތުވާ ކަމަށް ފަނޑިޔާރު ޝުޖޫން ވެސް އެއްބަސްވެވަޑައިގަންނަވަ އެވެ. ނަމަވެސް ޤާނޫނުލްއުޤޫބާތުގެ މާއްދާ އެ ގޮތަށް އޮތުމުން ޤާނޫނާ ޚިލާފަށް އެ އަމުރު ނުނެގެވޭނެ ކަމަށް އޭނާގެ ރައުޔުގައި ފާހަގަ ކުރެއްވި އެވެ.

ފަނޑިޔާރު ޝުޖޫންގެ ރައުޔަކީ އެއީ ގޯސް މާއްދާއެއް ނަމަ އެ ފަރުވާ ހޯދަން ޖެހޭނީ ރައްޔިތުންގެ މަޖިލީހުން ކަމަށެވެ. ސުޕްރީމް ކޯޓުން ނޫންކަމަށެވެ.

މިއީ 2016 ވަނަ އަހަރު ފަހުން ސުޕްރީމް ކޯޓުން މަރުގެ ޙުކުމެއް ދެމެހެއްޓި ފުރަތަމަ ފަހަރެވެ.