ޕާކިސްތާނުގެ ކުންފުންޏަކުން އުފައްދާ ބޭސްތަކެއްގައި ކެމިކަލް ތަކެއް ހުރުމުން އެ ކުންފުނިން އުފައްދާ އެއްވެސް ދިޔާ ބޭހެއް ދިވެހިރާއްޖެ އެތެރެކުރުމާއި ވިއްކުމާއި ބޭނުންކުރުން މޯލްޑިވްސް ފުޑް އެންޑް ޑްރަގު އޮތޯރިޓީ (އެމްއެފްޑީއޭ)އިން މަނާކޮށްފިއެވެ.

އެމްއެފްޑީއޭ އިން މިކަމާ ބެހޭގޮތުން މިއަދު ވަނީ ސަމާލުގެ މެސެޖެއްވެސް ނެރެފައެވެ.

އެ އިދާރާއިންް ނެރުނު މެސެޖް ގައި ބުނެފައިވަނީ  ޕާކިސްތާނުގެ ބޭސް އުފައްދާ ކުންފުންޏެއްކަމަށްވާ ފާމިކްސް ލެބޯޓަރީސް ޕްރައިވެޓް ލިމިޓެޑް އިން އުފައްދާ އެއްވެސް ދިޔާ ބޭސްތަކެއް ދިވެހިރާއްޖެ އެތެރެކުރުމާއި ވިއްކުމާއި ބޭނުންކުރުން މަކީ މަނާ ކަމެއްކަމަށެވެ.

Advertisement

މިބޭސް ތަކަކީ: 

1. އެލާގޯ ސިރަޕް

2. އެލައިޑް ސިރަޕް

3. އެފެލައިޑް ސިރަޕް

4. އެމިޑޯން ސިރަޕް

5. އައިރޯޕަލް ސިރަޕް

6. އެންޓިފެން ސިރަޕް

އެ އޮތޯރިޓީން ހުއްދަ ދީފައިވާ ބޭސް ލިސްޓްގައި ހިމެނޭ މި ކުންފުނިން އުފައްދާ ދިޔާ ބޭސްތައް ބޭސްފިހާރަތަކުން ނަގައި، ހަމަޖެހިފައިވާ އުސޫލާ އެއްގޮތަށް ބޭސް ނައްތާލުމުގެ ކަންކަން ކުރިއަށް ގެންދިއުމަށް އެމްއެފްޑީއޭ އިން ވަނީ އިލްތިމާސްކޮށްފައެވެ.

ދާދި ފަހުން މިވަނީ ހޮޑުލުން މަނާކުރުމަށް ބޭނުންކުރާ ބޭހަކާއި ސިޓްރިޒަނެއްގައި ވެސް ކެމިކަލް ހުންނަކަން ފާހަގަވެ ބޭނުންކުރުން ހުއްޓައިލުމަށް އެ އިދާރާއިން އަންގާފައެވެ.