ރައީސުލްޖުމްހޫރިއްޔާ ޑރ.މުހައްމަދު މުއިއްޒު ދުބާއީގައި ދިރިއުޅޭ ދިވެހި ރައްޔިތުންނާއި ބައްދަލު ކުރައްވައިފިއެވެ.
ރައީސް އޮފީހުން ޓްވިޓާގައި ކުރި ޕޯސްޓެއްގައި ބުނީ ދުބާއީގައި އޮތް ސީއޯޕީ28 ބައްދަލުވުމަށް ވަޑައިގެން، އެ ގައުމުގައި ދިރިއުޅޭ ދިވެހިންނާއި ބައްދަލުކޮށްފައި ވާކަމަށެވެ.
މި ބައްދަލުވުމުގައި ރައީސް ޑރ.މުއިއްޒު ވަނީ އެ ގައުމުގައި ދިރިއުޅޭ ރައްޔިތުންނަށް ދިމާވާ ދަތިތަކާއި ރައްޔިތުން ބޭނުންވާ ކަންކަމާއި ބެހޭގޮތުން އޮޅުއްފިލުއްވާފައިއެވެ.
ރައީސް ވަނީ މިމަހުގެ 26 ވަނަ ދުވަހު ތުރުކީއަށް ކުރެއްވި ރަސްމީ ދަތުރުފުޅުގައިވެސް އެގައުމުގައި ދިރިއުޅޭ ދިވެހިންނާއި ބައްދަލު ކޮށްފައެވެ.
މި ބައްދަލުވުމުގައި، އެމަނިކުފާނު ވަނީ ތުރުކީގައި ދިވެހި ރާއްޖޭގެ އެމްބަސީއެއް ހުޅުވުމުގެ މަސައްކަތް ކުރައްވާނެ ކަމަށް ވިދާޅުވެފައެވެ. މީގެ އިތުރުންވެސް އެ ގައުމުގައި ބޭންކް އޮފް މޯލްޑިވްސް (ބީއެމްއެލް) އެކައުންޓްތަކުން ފައިސާގެ ލިމިޓް މިހާރު އޮތް ގޮތުން ދިމާވާ ދަތިތަކަށް ހައްލު ހޯދައިދެއްވުމަށްގައުމީ ބޭންކާ އެކަމާ ގުޅޭ ގޮތުން މަޝްވަރާ ކުރައްވައި ހައްލެއް ހޯއްދަވައި ދެއްވާނެ ކަމަށް ވިދާޅުވެފައެވެ.
ރައީސް ތުރުކީ އަށް ކުރެއްވި ރަސްމީ ދަތުރު ނިންމަވާލެއްވުމަށް ފަހު ދުބާއީ އަށް ވަޑައިގެންނެވީ މިމަހު 29 ގައެވެ.
Advertisement
This content is created and paid for by advertisers and does not involve Voice Journalists
