އަސްކަރީ އެއްވެސް ނުފޫޒެއް ރާއްޖޭގައި އޮންނާކަށް ބޭނުންނުވާ ކަމަށާއި ދިވެހިން ބޭނުންވަނީ މިނިވަން ކަމާއިއެކު އަމިއްލަ ގައުމުގެ މުސްތަގުބަލު ބިނާ ކުރަން ކަމަށް ރައީސުލް ޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވެފައި މިވަނީ ބްލޫމްބަރގް ޓީވީއަށް ދެއްވި ބަސްދީގަތުމެއްގައެވެ.

މި ބަސްދީގަތުމުގައި ރައީސް ޑރ.މުއިއްޒު ވިދާޅުވީ، އެއްވެސް ޤައުމެއްގެ އަސްކަރީ ނުފޫޒެއް ރާއްޖޭގައި އޮންނަން ބޭނުން ނުވާ ކަމަަށާއި މީގެ ބަދަލުގައި ދިވެހި ރާއްޖެއަށް ބޭނުންވަނީ އެހެން ޤައުމުތަކުގެ އެހީތެރިކަމާއި އެއްބާރުލުން ކަމަށެވެ.

ދިވެހި ރާއްޖޭގައި އިންޑިއާ ސިފައިން ތިބުމާއި މެދު އަލިއަޅުއްވާލައްވައި އެމަނިކުފާނު ވިދާޅުވީ މިހާރުވެސް އިންޑިއާ ސަރުކާރާއެކު މިމައްސަލަ އާއި ގުޅީގެން މަޝްވަރާތައް ފަށާފައިވާކަމަށެވެ. އަދި އިންޑިއާގެ ހައި ކޮމިޝަނާއެކު ކާމިޔާބު ބައްދަލުވުންތަކެއްވެސް ބޭއްވިފައި ވާކަމަށްވެސް ރައީސް ޑރ.މުއިއްޒު ވިދާޅުވިއެވެ.

އެ މަނިކުފާނު ވިދާޅުވީ، އިންޑިއާގެ 75 ސިފައިން އަނބުރާ ގެންދިއުމަކީ އެ ގައުމަށް އުނދަގޫކަމެއް ނޫން ކަމަށެވެ. އަދި އިންޑިއާގެ ސިފައިން ރާއްޖޭގައި ކުރަން ތިބި މަސައްކަތް ތަކަށް ދިވެހީން އައްޔަނު ނުކުރެވެންވީ ސަބަބެއް ނެތް ކަމަށް ވެސް ވިދާޅުވިއެވެ.

މީގެ އިތުރުންވެސް ރައީސް ޑރ. މުއިއްޒު ވިދާޅުވީ މި މައްސަލައިގެ ސަބަބުން އިންޑިއާ އާއި ދިވެހި ރާއްޖެއާއި ދެމެދު އޮތް ވިޔަފާރީގެ ގުޅުމަށް ބުރޫ ނާރާނެ ކަމަށެވެ. އެންމެ މުހިންމު ކަމަކީ ދިވެހި ރާއްޖެ މިނިވަންކަންމަތީ ދެމިއޮތުން ކަމަށާއި މި ފަދައިން ގައުމު ދެމިއޮތުމަށް ސަރުކާރުން ކުރާ ކޮންމެ ކަމަކަށް ވެސް އިންޑިއާއިން އިހުތިރާމް ކުރާނެ ކަމަށް ގަބޫލުފުޅު ކުރައްވާ ކަމަށް ވެސް އެމަނިކުފާނުގެ ވާހަކަފުޅުގައި ވިދާޅުވިއެވެ.

ރައީސް ޑރ.މުއިއްޒު އިތުރަށް ވިދާޅުވީ،އެހެން ގައުމު ތަކުގެ މެދުގައި ހިނގާ ކޯޅުންތަކުގެ ތެރެއަށް ނުވަންނާނެ ކަމަށާއި ބައިނަލްއަޤުވާމީ ކޯޅުންތަކުގެ ތެރެއަށް ވަނުމަށް ރާއްޖެއަކީ ކުޑަ ގައުމެއްް ކަމަށެވެ. އަދި ރާއްޖެއިން ކޮންމެ ގައުމެއްގެ މިނިވަންކަމަށް އިހުތިރާމު ކުރާނެ ކަމަށްވެސް ވިދާޅުވިއެވެ.