ނޭޝަނަލް ބޯޓިން އެސޯސިއޭޝަން އޮފް މޯލްޑިވްސް އިން ބާއްވާ މޯލްޑިވްސް ބޯޓިން އެވޯޑް ދިނުމުގެ 7 ވަނަ އެވޯޑް ހަފްލާ ބާއްވައިފިއެވެ.

މި ހަފްލާ ބާއްވާފައި ވަނީ ކުރުނބާ މޯލްޑިވްސް ރިސޯޓްގައެވެ. މި ހަފްލާގައި ބޯޓިން ސިނާއަތުގެ ތެރެއިން 31 ކެޓަގަރީއަކަށް އެވޯޑް ދީފައިވާއިރު ވަކި ފަރުދުންނަށް ވަނީ 8 ކެޓަގަރީއަކުން އެވޯޑް ދީފައެވެ.

ބޯޓިން އެސޯސިއޭޝަންގެ ފްލެގްޝިޕް އިވެންޓުގައި، މި ޝަރަފުވެރި އެވޯޑަށް ވަނަތައް ހޮވާފައިވަނީ މި ދާއިރާގެ ތަޖުރިބާހުރި ފަނޑިޔާރުން ގެ ޓީމަކުން ދިން ޕޮއިންޓާއި އޮންލައިންކޮށް ނެގުނު ވޯޓު ހިމަނައިގެންނެވެ.

ފަނޑިޔާރުންގެ ޓީމުގައި ހިމެނޭ ފަރާތްތަކަކީ އަހްމަދު ޖާބިރާއި، އަބްދުﷲ ހަމީދް އަލީ އާއި،ސައިފުﷲ ސައުދާއި، އަލީ އިބްރާހިމާއި، ޝައްމޫން ޝަރީފް ގެ އިތުރުން ކެޕްޓަން އާދިލް ރަޝީދެވެ. 

ވަކި ފަރުދުންނަށް ދޭ 8 އެވޯޑުގެ އިތުރުން 31 ކެޓަގަރީއަކަށް އެވޯޑް ދޭ މިހަފްލާގައި މިއަހަރު 130 ފަރާތަކުން ވަނީ އެވޯޑަށް ހުށައަޅާފައެވެ.

 މީގެ އިތުރުންވެސް ބޯޓިން އިންޑަސްޓްރީއަށް ކޮށްދެއްވި  އަގުހުރި ޚިދުމަތްތަކުގެ ސަބަބުން ނޭޝަނަލް ބޯޓިން އެސޯސިއޭޝަން އޮފް މޯލްޑިވްސްގެ އަލަށް އިންތިހާބުވި ރައީސް އަލްފާޟިލް އާމިރު މަންސޫރަށް އަހަރުގެ އެންމެ މޮޅު ބޯޓިން ޕާސަނަލިޓީގެ ޝަރަފު ލިބިވަޑައިގެންފައިވާކަންވެސް ފާހަގަ ކޮށްލަން ޖެހެއެވެ.

މި އަހަރުގެ އެވޯޑް ހަފްލާ ޝަރަފުވެރިކޮށްދެއްވީ މިނިސްޓަރ އޮފް ޓޫރިޒަމް އިބްރާހިމް ފައިސަލެވެ.

އެބޭފުޅާގެ އިތުރުން މޯލްޑިވްސް ކަސްޓަމްސް ސަރވިސްގެ ކޮމިޝަނަރ ޖެނެރަލް އަލްފާޟިލް ޔޫސުފް މާނިއު މުޙައްމަދުވެސް މި ހަފްލާގައި ބައިވެރިވެ ވަޑައިގެންނެވިއެވެ.

މީގެ އިތުރުންވެސް މި ހަފްލާގައި ބޯޓިން އިންޑަސްޓްރީގެ ސްޓޭކްހޯލްޑަރުންނާއި ޕާޓްނަރުންނާއި ސްޕޮންސަރުންގެ އިތުރުން ނޭޝަނަލް ބޯޓިން އެސޯސިއޭޝަން އޮފް މޯލްޑިވްސްގެ މެމްބަރުން މި ހަފްލާގައި ވަނީ ބައިވެރިވެފައެވެ.

2016 ވަނަ އަހަރު ދޭންފެށި މި އެވޯޑަކީ ، ވިޔަފާރި އަދި އިމާރާތްކުރުމުގެ ދާއިރާއިން ބޯޓިން އިންޑަސްޓްރީގައި މަސައްކަތްކުރާ ފަރާތްތަކުގެ އަގު ވަޒަން ކުރުމުގެ ގޮތުން ދޭން ފެށި އެވޯޑެކެވެ.