ޤައުމީ ބޯޓިން އިންޑަސްޓްރީއިން ބޭއްވި މިއަހަރުގެ ބޯޓިން އެވޯޑުގެ އެންމެ ގިނަ އެވޯޑު ލިބުނު ކުންފުންޏަކީ މޯލްޑިވްސް ޓްރާންސްޕޯޓު އެންޑް ކޮންޓްރެކްޓިން ކޮމްޕެނީ (އެމްޓީސީސީ) އަށެވެ. 

ކުރުބާ މޯލްޑިވްސް ރިސޯޓުގައި ހޮނިހިރު ދުވަހުގެ ހަވީރު ކުރިއަށް ގެންދިޔަ ބޯޓިން އެވޯޑު ދިނުމުގެ ރަސްމިއްޔާތުގައި ކުންފުނީގެ ބައިންނާއި އަމިއްލަ ފަރާތްތަކުގެ ކެޓަގަރީން 39 އެވޯޑެއް ވަނީ ދީފައެވެ. 

މި ރަސްމިއްޔާތުގައި އެންމެ ގިނަ އެވޯޑު ލިބުނު ކުންފުންޏަކަށް އެމްޓީސީސީ ވެގެން ގޮސްފައިވާއިރު، އެ ކުންފުންޏަށް ވަނީ ޖުމްލަ ް5 ކެޓަގަރީއަކުން އެވޯޑު ލިބިގެން ގޮސްފަ އެވެ. އޭގެ ތެރޭގައި ހިމެނެނީ:

1. މެރިން އިންޖިނިއަރިން ސާވިސް ޕްރޮވައިޑާ އޮފް ދި އިޔާ

2. ޑޮކްޔާޑް/ ސްލިޕްވޭ އޮފް ދަ އިޔާ

3. މޯސްޓް ޕްރިފާޑް މެރިން އިންޖީން ބްރޭންޑް އޮފް ދަ އިޔާ (މެއިން އިންޖީން)

4. ބެސްޓް ލޯކަލް ފެރީ ސާވިސް ޕްރޮވައިޑާ

5. ބެސްޓް އިންޖިނިއަރިން

އެމްޓީސީސީއަށް ބެސްޓު އިންޖިނިއަރިން އެވޯޑު ލިބިފައިވަނީ އަމިއްލަ ފަރާތްތަކުގެ ކެޓަގަރީތަކުގެ ބައިންނެވެ. 

ޤައުމީ ބޯޓިން އެވޯޑަކީ އެ ދާއިރާގައި މަސައްކަތްކުރާ ފަރާތްތަކުގެ އަގުވަޒަންކޮށް ހިތްވަރުދިނުމުގެ ގޮތުން 2016 ވަނަ އަހަރު ފަށައިގެން ކުރިއަށް ގެންދާ އެވޯޑެކެވެ. 

އެހެން ނަމަވެސް ކޯވިޑްގެ ދުވަސްވަރު އެ އެވޯޑު ދިނުން މެދުކެނޑިފައި އޮތުމަށްފަހު މިދިޔަ އަހަރު ވަނީ އެ އެވޯޑު އަލުން ދޭން ފަށައިފަ އެވެ. 

ބޯޓިން އެސޯސިއޭޝަނުން މައުލޫމާތު ދިން ގޮތުގައި މިފަހަރު އެވޯޑު ލިބުނު ފަރާތްތައް ހޮވާފައި ވަނީ އޮންލައިންކޮށް ލިބޭ ވޯޓުތަކާއި ޖަޖުންގެ ޕެނަލްއަކުން ދިން މާކްސްއަށް ބަލައިގެންނެވެ. 

މިއަހަރުގެ އެވޯޑު ދިނުމުގެ ރަސްމިއްޔާތު ޝަރަފުވެރިކޮށްދެއްވާފައި ވަނީ ޓުއަރިޒަމް މިނިސްޓަރު އިބްރާހިމް ފައިސަލްއެވެ. 

އޭގެ އިތުރުން މި ރަސްމިއްޔާތުގައި މޯލްޑިވްސް ކަސްޓަމްސް ސާވިސްގެ ކޮމިޝަނާ ޖެނެރަލް ޔޫސުފް މާނިއު މުހައްމަދު ވެސް ބައިވެރިވެވަޑައިގެންނެވި އެވެ.