ދިވެހިރާއްޖޭގައި ތިބި އިންޑިއާ ސިފައިން އަނބުރާ ގެންދިއުމަށް އެ ޤައުމުން އެއްބަސްވެފައިވާކަން ރައީސުލްޖުމްހޫރިއްޔާ ޑރ މުހައްމަދު މުއިއްޒު ހާމަކުރައްވައިފި އެވެ.
އެމަނިކުފާނު މިފަދައިން ހާމަކުރައްވާފައި ވަނީ ތުރުކީއާއި، އެކުވެރި އަރަބި އިމާރާތް (ޔޫއޭއީ) އަށް ކުރެއްވި ދަތުރުފުޅު ނިންމަވާލެއްވުމަށްފަހު އަނބުރާ ރާއްޖެ ވަޑައިގެން ބެއްވި އެމަނިކުފާނުގެ ފުރަތަމަ ނޫސްވެރިންގެ ބައްދަލުވުމުގައި ވާހަކަދައްކަވަމުން ނެވެ.
ރައީސް ޑރ މުއިއްޒު ވަނީ ދުބާއީގައި ކުރިއަށް ދިޔަ ކޮޕް ސަމިޓުގެ ހަވާސާގެ ތެރެއިން އިންޑިއާގެ ބޮޑުވަޒީރު ނަރެންދްރަ މޯދީއާއި ބައްދަލުކުރައްވާފަ އެވެ.
އެ ބައްދަލުވުމުގައި މަޝްވަރާކުރެވުނު ކަންތައްތަކާއި ގުޅޭގޮތުން ނޫސްވެރިންނަށް މައުލޫމާތު ދެއްވަމުން ރައީސް ޑރ މުހައްމަދު މުއިއްޒު ވިދާޅުވީ އިންޑިއާ ސިފައިން އަނބުރާ ފޮނުވާލުމުގެ މަސައްކަތް ޑިޕްލޮމެސީގެ ރިވެތި އުސޫލުން ކުރިއަށް ގެންދިއުމުގެ މަސައްކަތް ފުރަތަމަ ދުވަހުން ފެށިގެން ކުރައްވަމުން ގެންދާ ކަމަށެވެ.
އެގޮތުން އެ މަސައްކަތް ކުރުމަށް ދެ ގައުމު ޝާމިލުވާ ޓެކްނިކަލް ކޮމެޓީއެއް އެކުލަވާލާފައިވާ ކަމަށާއި، އެ ކޮމެޓީގެ މަސައްކަތްތަކުގެ ތެރެއިން އިންޑިއާ ސިފައިން އަނބުރާ ފޮނުވާލުމުގެ މަސައްކަތް ކުރިއަށްދާނެ ކަމަށް ރައީސް ވިދާޅުވި އެވެ.
އެމަނިކުފާނު ވިދާޅުވީ އިންޑިއާ ސިފައިން އަނބުރާ ގެންދިއުމަކީ ރާއްޖޭގެ ރައްޔިތުން ނިންމާފައިވާ ޑިމޮކްރެޓިކް ނިންމުމެއްކަން އިންޑިއާއިން ވެސް ގަބޫލުކުރާ ކަމަށާއި، ރައްޔިތުން އެދޭގޮތަށް އިންޑިއާ ސިފައިން އަނބުރާ ގެންދިއުމަށް އެ ގައުމުން ވެސް އެއްބަސްވެފައިވާ ކަމަށެވެ.
"އޭގެ ކުރިން ކުރެވުނު މަސައްކަތާއި މިއަދާއި ހަމައަށް އައިއިރު ކުރެވުނު މަަސައްްކަތާއި އިންޑިއާ ސަރުކާރުން އަޅުގަނޑުމެންނަށް އެއްބަސްވެފައި ވަނީ އިންޑިއާ ސިފައިން އަނބުރާ ގެންދަވާނެ ކަމަށް"
ރައީސް ޑރ މުހައްމަދު މުއިއްޒު
އޭގެ އިތުރުން ރައީސުލްޖުމްހޫރިއްޔާ ޑރ މުއިއްޒު ވިދާޅުވީ އިންޑިއާއިން ރާއްޖޭގައި ކުރިއަށް ގެންދާ މަޝްރޫއުތައް ވެސް އަވަސް ކުރުމާއި ގުޅޭގޮތުން ދެ ގައުމު ޝާމިލުވާހެން އކުލަވާލާ ހައިލެވަލް ޓެކްނިކަލް ކޮމެޓީއިން މަޝްވަރާތައްކޮށް ނިންމުންތައް ނިންމާނެ ކަމަށެވެ.
އޭގެ ސަބަބުން މަޝްރޫއުތައް އަވަސްވެގެން ދިއުމުގެ އިތުރުން އިންޑިއާއިން ނަގާފައިވާ ލޯނުތައް އަނބުރާ ދެއްކުމުގައި ވެސް ދެ ގައުމަށް އެއްބަސްވެވޭ ލުއި ގޮތްތަކެއް ހޯދިގެންދާނެ ކަމަށް ރައީސް ޑރ މުއިއްޒު ވިދާޅުވި އެވެ.
"މިސާލަކަށް އަޅުގަނޑު ފާހަގަކުރި އެއް މަޝްރޫއަކީ މާލޭގެ ކައިރީގައި މި ހިނގާ ބްރިޖް މަޝްރޫއު، ދެން ހުރި މަޝްރޫއުތަކާއި އެކި އެކި ލޯނުތަކުގައި ދިމާވާ ކަންކަމާއި، ގައުމަށް ދިމާވެފައިވާ ބޮޑެތި މައްސަލަތަކާއި، މިކަންކަމުގައި ވަގުތުން ވަގުތަށް ނިންމުން ނިންމޭ ކަހަލަ ހައިލެވެލް ކޮމެޓީއެއް އެކުލަވާލާ ދެ ގައުމުން އެއްބަސް މިވީ"
ރައީސް ޑރ މުއިއްޒު
ގަވައިދާއި ޚިލާފަށް ރާއްޖޭގައި ގިނަ އަދަދެއްގެ އިންޑިއާ ސިފައިން ތިބުމަކީ ރާއްޖޭގެ މިނިވަންކަމާއި ސިޔާދަތަށް ބުރޫއަރާނެ ކަމެއްކަން ފާހަގަކޮށް، އިންޑިއާ ސިފައިން އަނބުރާ ފޮނުވާލާނެކަމަށް ރައީސް ޑރ މުއިއްޒު ވަނީ ރިޔާސީ އިންތިޚާބުގެ ކެމްޕޭނުގައި ވައުދުވެވަޑައިގެންފަ އެވެ.
އެ މަސައްކަތަކީ އެމަނިކުފާނު ވެރިކަމުގެ މަސްއޫލިއްޔަތުތަކާއި ރަސްމީކޮށް ހަވާލުވެވަޑައިގަތުމަށްފަހު އެންމެ އިސްކަމެއް ދީގެން ކުރައްވާނެ ކަމެއްގެ ގޮތުގައި ވަނީ، އެމަނިކުފާނުގެ ހަފްތާ 14 މަގުޗާޓުގައި ވެސް ހިމަނުއްވާފަ އެވެ.
އިންޑިއާ ސިފައިން ރާއްޖެއިން ބޭލުމުގެ މަސައްކަތް ފުރަތަމަ ދުވަހު އެމަނިކުފާނު ފައްޓަވާފައިވާއިރު، ވަރަށް އަވަހަށް އެކަން ހާސިލްވެގެންދާނެ ކަމުގެ ފުރިހަމަ ޔަގީންކަން ދެއްވާކަމަށް ރައީސް ޑރ މުއިއްޒު ވަނީ ވިދާޅުވެފަ އެވެ.
Advertisement
This content is created and paid for by advertisers and does not involve Voice Journalists
