ދައުލަތުން ރަސްމީ ދަތުރުތަކަށް ކުރާ ޚަރަދު ކުޑަކުރުމަށް ޚާއްސަ ސަމާލުކަމެއް ދެއްވާނެ ކަމަށާއި، އެގޮތުން ރަސްމީ ދަތުރުތައް ފަސްޓް ކްލާހުގައި ކުރެއްވުމަކީ ރައީސުލްޖުމްހޫރިއްޔާ އާއި، އެމަނިކުފާނުގެ ނައިބު ވެސް ކުރައްވަން ބޭނުންފުޅުވާ ކަމެއް ނޫންކަމަށް ރައީސުލްޖުމްހޫރިއްޔާ ޑރ މުހައްމަދު މުއިއްޒު ވިދާޅުވެއްޖެ އެވެ.

ރައީސުލްޖުމްހޫރިއްޔާ ޑރ މުހައްމަދު މުއިއްޒު ދުބާއީއަށް ކުރެއްވި ދަތުރުފުޅު ނިންމަވާލެއްވުމަށްފަހު އަނބުރާ ރާއްޖެ ވަޑައިގެން ނޫސްވެރިންނާއި ބައްދަލުކުރައްވާ ވާހަކަދައްކަވަމުން ވިދާޅުވީ، އެމަނިކުފާނު ކުރައްވާ ދަތުރުފުޅުތަކުގެ ޚަރަދު ތަފްސީލުތައް 15 ދުވަސްތެރޭ ހާމަކުރައްވަން ނިންމަވާފައިވާ ކަމަށެވެ. 

އޭގެ އިތުރުން ދަތުރު ޚަރަދު ކުޑަކުރުމަކީ ސަރުކާރުން ޚާއްސަ އަހަންމިއްޔަތެއް ދޭނެ ކަމެއް ކަމަށާއި، އެގޮތުން ރައީސުލްޖުމްހޫރިއްޔާ އަދި އެމަނިކުފާނުގެ ނައިބު ވެސް ރަސްމީ ދަތުރުފުޅުދައް ފަސްޓް ކުލާހުގައި ކުރައްވަން ބޭނުންފުޅު ނުވާކަމަށް ރައީސުލްޖުމްހޫރިއްޔާ ޑރ މުއިއްޒު ވިދާޅުވި އެވެ. 

އެމަނިކުފާނުގެ ދުބާއީ ދަތުރުފުޅަކީ ފަސްޓު ކުލާސް ދަތުރުފުޅެއް ނަމަވެސް، އެ ދަތުރުފުޅު އެގޮތަށް ކުރައްވަން ޖެހިވަޑައިގަތީ ބިޒްނަލް ކުލާހުގެ ޓިކެޓު ލިބިވަޑައިނުގެންނެވުމުން ކަމަށް ރައީސުލްޖުމްހޫރިއްޔާ ޑރ މުއިއްޒު ވިދާޅުވި އެވެ. 

އެމަނިކުފާނު ވިދާޅުވީ ބޭނުންފުޅުވެލައްވަނީ ފަސްޓް ކުލާސް ދަތުރުފުޅުތައް ކުރެއްވުމަށް ނޫން ކަމަށެވެ.

އޭގެ ބަދަލުގައި ދަތުރުފުޅުތަކުގެ ބޭނުމެއްކަމުގައި ހައްދަވާނީ ރައްޔިތުންނަށް ލާބައާއި މަންފާވާނެ ކަންކން ހޯދައިދީ، ރާއްޖޭގެ ތަރައްގީއަށް މަހުފަހިވާނެ ކަންކަން ހޯދުންކަމަށް ރައީސުލްޖުމްހޫރިއްޔާ ޑރ މުއިއްޒު ވިދާޅުވި އެވެ. 

އޭގެ އިތުރުން އެމަނިކުފާނު ވަނީ ދަތުރު ޚަރަދުތައް ކުޑަކުރުމަށް، ދަތުރުފުޅުތަކުގައި ބައިވެރިވެވަޑައިގަންނަވާ ބޭފުޅުންގެ އަދަދުތައް ވެސް މަދުކޮށް، ކޮންމެހެން ހިމަނަން ޖެހޭ ބޭފުޅުން ނޫން ބޭފުޅުން ނުގެންދަވާނެ ކަމަށް ވިދާޅުވެފަ އެވެ.