ކުރީގެ ބަންޑާރަ ނައިބް އަލްއުސްތާޒާ އައިޝަތު އާޒިމާ ޝަކޫރު, ޕީއެންސީގެ ފަރާތުން މާލެ ސިޓީ ކައުންސިލް ގެ މޭޔަރު ކަމަށް ކުރިމަތި ލުމަށް ފޯމު ހުށައަޅައިފިއެވެ.
ޕީއެންސީގެ ފަރާތުން މި ފޯމާއި ހަވާލުވީ ޕީއެންސީގެ ރައީސް އަބްދުއްރަހީމް އަބްދުالله އެވެ.
ފޯމު ހުށައެޅުމަށް ފަހު ނޫސްވެރިންނާއި ދެއްވި ބަސްދީގަތުމެއްގައި އާޒިމާ ވިދާޅުވީ މިވަގުތު މިއީ ސަރުކާރާއި އެކުގައި މަސައްކަތް ކުރާނެ ހީވާގި، މުރާލި، ކަންކަން ދަންނަ މޭޔަރެއް ގެންނަންވީ ވަގުތު ކަމަށެވެ.
" ޑރ.މުއިއްޒު އެބައޮތް ވަރަށް ފާމް ކޮމިޓްމެންޓަ ތަކެއް މާލޭގެ ރައްޔިތުންނަށް ދެއްވާފައި. އެހެންވީމަ މިގަޑީގައި ސަރުކާރާއި އެކުގައި މަސައްކަތް ކުރެވޭނެ ހީވާގި މުރާލި އަދި ކަންކަން ދަންނަ މީހަކު ގެނައުމަކީ އަޅުގަނޑު ދެކޭގޮތުގައި މާލޭގެ ހުރިހާ މައްސަލަތައް ހައްލު ކުރުމަށް އެންމެ މުހިންމު ކަންތައް."
އާޒިމާ ޝަކޫރު
މީގެ އިތުރުންވެސް އޭނާ ވިދާޅުވީ މާލެ އަކީ ރާއްޖޭގެ ދެބައި ކުޅަ އެއްބަޔާއި ގާތްކުރާ އަދަދަކަށް ރައްޔިތުން ދިރިއުޅޭ ރަށަށް ވާތީ،ދިވެހި ރާއްޖެ އަށް ކުރިމަތި ވެފައިވާ ބޮޑެތި ގައުމީ މައްސަލަތައް މާލޭގައި ހުރި މައްސަލަތައް ހައްލުނުކުރެވޭހާ ހިނދަކު، ހައްލު ނުވާނެ ކަަމަށް ޤަބޫލުފުޅު ކުރައްވާ ކަމަށެވެ.
އާޒިމާ ގެ އިތުރުންވެސް މާލެ ސިޓީގެ މޭޔަރު ކަމަށް އިދިކޮޅު އެމްޑީޕީން އެމްޓީސީސީގެ ކުރީގެ އެމްޑީ އާދަމް އާޒިމް ވާދަކުރައްވާއިރު، ކުރީގެ ރައީސް ޔާމީން އަބްދުލްޤައްޔޫމް ގެ ޕާޓީ ކަމުގައިވާ ޕީއެންސީގެ ފަރާތުން ކުރީގެ ސީޕީ ހުސެން ވަހީދު ކުރިމަތިލައްވާނެ ކަމަށް ރައީސް ޔާމީން ގެ ވަކީލު ޑރ. މުހައްމަދު ޖަމީލް ވަނީ ވިދާޅުވެފައެވެ.
Advertisement
This content is created and paid for by advertisers and does not involve Voice Journalists
