އިންޑިއާއިން ދިވެހި ރާއްޖެއަށް ކަނޑައަޅުއްވާފައި ހުންނަވާ ސަފީރު މުނޫ މަހާވަރާއި ޑިފެންސް މިނިސްޓަރު މުހައްމަދު ޣައްސާން މައުމޫން މިއަދު ބައްދަލު ކުރަައްވައިފިއެވެ.

މި ބައްދަލުވުމާއި ބެހޭގޮތުން ޑިފެންސް މިނިސްޓްރީން އެކްސްގައި ކުރި ޕޯސްޓެއްގައި ބުނީ، މި ބައްދަލުވުމުގައި އަލި އަޅުވާލައްވާފައިވަނީ ދިފާއީ ދާއިރާއިން މިހާރު ވެސް ދެ ގައުމުން ގެންދާ އެއްބާރުލުމާ ގުޅޭ ގޮތުން ކަމަށެވެ.

އެމެރިކާއިން ރާއްޖެ ކަނޑައަޅުއްވާފައި ހުންނަވާ ސަފީރު ހޫގޯ ޔަން ވެސް މިއަދު ޣައްސާނާ ބައްދަލުކުރައްވާ، ޑިފެންސް ދާއިރާގައި އޮންނަ އެއްބާރުލުން ކުރިއެރުވުމާ ބެހޭގޮތުން މަޝްވަރާކޮށްފައިވާކަން ފާހަގަ ކޮށްލަން ޖެހެއެވެ.

މީގެ އިތުރުންވެސް އިނގިރޭސިވިލާތުން ދިވެހި ރާއްޖެއަށް ކަނޑއަޅުއްވާފައި ހުންނަވާ ސަފީރު ކެރޮން ރޮސްލާ ވެސް މިއަދު މިނިސްޓަރ ޣައްސާނާ ބައްދަލުކުރައްވައި، ދިފާއީ ދާއިރާގައި ދެ ގައުމުގެ އެއްބާރުލުން އިތުރުކުރުމާ ގުޅޭ ގޮތުން މަޝްވަރާ ކުރެއްވި ކަމަށް ޑިފެންސް މިނިސްޓްރީން މައުލޫމާތުދެއެވެ.

މިދިޔަ މަހުގެ 30 ގައި ދުބާއީ ގައި އޮތް ސީއޯޕީ28 އަށް ވަޑައިގެން އެބައްދަލުވުމުގެ ހަވާސާގައި ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވަނީ އިންޑިއާގެ ބޮޑު ވަޒީރު ނަރެންދްރަ މޯދީ އާއި ވެސް ބައްދަލު ކުރައްވާފައެވެ. މިބައްދަލުވުމުގައި ދެގައުމުގެ  ދޭދޭ ގުޅުން ބަދަހިކުރުމުގެ މުހިންމުކަން ފާހަގަ ކުރައްވާ، މި އިޤްތިޞާދީ ދާއިރާއިންނާއި، ގެޤައުމުގެ ދެމެދުގައިވާ ޒަމާންވީ ގުޅުން މިހާރަށްވުރެ އިތުރަށް ހަރުދަނާ ކުރެވިދާނެ ކަންތައްތަކާއި ގުޅޭގޮތުން ދެބޭފުޅުން ވަނީ މަޝްވަރާ ކުރައްވާފަ އެވެ.

އަދި މިއަދު އެނބުރި ރާއްޖެއަށް ވަޑައިގެން ވެލާނާ އިންޓަނޭޝަނަލް އެއާޕޯޓުގައި ނޫސްވެރިންނާއި އެކު ބޭއްވި ބައްދަލުވުމެއްގައި ދިވެހިރާއްޖޭގައި ތިބި އިންޑިއާ ސިފައިން އަނބުރާ ގެންދިއުމަށް އެ ޤައުމުން އެއްބަސްވެފައިވާކަމަށާއި އިންޑިއާގެ ސިފައިން، މިގައުމުން ވަރަށް އަވަހަށް ބޭލޭނެ ކަމަށް އެމަނިކުފާނު ވަނީ ވިދާޅުވެފައެވެ.