ކުރީގެ ރައީސް ޔާމީން އަބްދުލް ގައްޔޫމް އަލަށް އުފެއްދެވި ޕާޓީ އާއި އެކު އަންނަ ގޮންޖެހުން ތަކާއި އެކުވެސް ކުރިއަށް ވަޑައިގެންނެވޭނެކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވީ މިއަދު ތުރުކީއަށް ކުރެއްވި ރަސްމީ ދަތުރުފުޅާއި ، ޔޫއޭއީގެ ދުބާއީގައި އޮތް ކޮޕް28 ނިންމަވާލެއްވުމަށްފަހު ރާއްޖެ ވަޑައިގެން ނޫސްވެރިންނާއި އެކު ބޭއްވި ބައްދަލުވުމެއްގައި ނޫސްވެރިޔަކު ކުރެއްވި ސުވާލަށް ޖަވާބު ދެއްވަމުންނެވެ.

ރައީސް ޑރ.މުއިއްޒު ވިދާޅުވީ ގައުމު ކުރިއެރުވުމުގައި ހުރިހާ ބޭފުޅުންގެ އެއްބާރުލުމާއި އެކީގައި ގައުމު އިސްކޮށްގެން ދާން ބޭނުންވާނަމަ ރައީސް ޔާމީން އާ ސިޔާސީ ޕާޓީއެއް އުފެއްދެވުމަކީ ވަރަށް ރަނގަޅު ގޮތެއް ކަމަށެވެ. 

Advertisement

އިތުރަށް އެމަނިކުފާނު ވިދާޅުވީ ގޮންޖެހުންތަކާއި ކުރިމަތި ލާން ޖެހެންޏާ އެ ގޮންޖެހުންތަކާއި އެކީގައި ގައުމީ ވިސްނުމުގައި ކުރިއަށް ދާނެ ކަމަށެވެ. އެ ކަމަކީ އެބޭފުޅުންގެ ތެރޭގައި މާ ބޮޑު ކަންތައްތަކެއް އުފެދިގެންދާނެ ކަމެއް ކަމަށް ދެކިވަޑައިނުގަންނަވާ ކަމަށް ވެސް ރައީސް ޑރ.މުއިއްޒު ވިދާޅުވިއެވެ.

ރައީސް ޑރ.މުއިއްޒު ވަނީ އެމަނިކުފާނު ހުވާ ކުރެއްވުމުގެ ރަސްމިއްޔާތުގައި ގައުމާ މުޚާތަބުކޮށް ވިދާޅުވި ފަދައިން އެކުވެރިކަމާއި، ގައުމު އިސްކުރުމުގައި ބައިބައިނުވުމާއި، ގައުމު އިސްކުރުމުގައި ދެމިހުންނަވާނެ ކަމަށް ވިދާޅުވެފައެވެ.