ދިވެހިރާއްޖެއިން ތުރުކީއަށް އެކްސްޕޯޓުކުރާ މަހުގެ ބާވަތްތަކުން ނަގާ ޓެރިފް ކުޑަކުރެވޭނެ ކަމުގެ ވަރަށް ބޮޑު އުންމީދެއް ލިބިގެން ގޮސްފައިވާކަމަށް ރައީސުލްޖުމްހޫރިއްޔާ ޑރ މުހައްމަދު މުއިއްޒު ވިދާޅުވެއްޖެ އެވެ.
ރައީސުލްޖުމްހޫރިއްޔާ ޑރ މުއިއްޒު މިފަދައިން ވިދާޅުވެފައި ވަނީ އެމަނިކުފާނު ދުބއީއަށް ކުރެއްވި ދަތުރުފުޅު ނިންމަވާލެއްވުމަށް ފަހު އަނބުރާ ރާއްޖެ ވަޑައިގެން ނޫސްވެރިންނާއި ބައްދަލުކުރައްވާ ދެއްކެވި ވާހަކަފުޅުގައެވެ.
ރައީސުލްޖުމްހޫރިއްޔާ ޑރ މުއިއްޒު ވިދާޅުވީ އެމަނިކުފާނު ތުރުކީއަށް ކުރެއްވި ރަސްމީ ދަތުރުފުުގައި ދެ ގައުމުގެ ދެމެދުގައި ވިޔަފާރީގެ މުއާމަލާތްތައް ފުޅާކުރުމަށް މަޝްވަރާކުރެވިފައިވާ ކަމަށެވެ. އަދި އެ ގައުމުގެ ދެމެދުގައި ވިޔަފާރި ފުޅާކުރުމުގެ އެއްބަސްވުމެއްގައި ވެސް ސޮއި ކުރެވިފައިވާ ކަމަށެވެ.
މި ކަމުގެ އިތުރު ތަފްސީލު ދެއްވަމުން ރައީސުލްޖުމްހޫރިއްޔާ ޑރ މުއިއްޒު ވިދާޅުވީ އެންމެ މުހިންމު ކަމެއްގެ ގޮތުގައި މަޝްވަރާ ކުރެވުނު އެއް ކަމަކީ ރާއްޖެއިން ތުރުކީއަށް އެކްސްޕޯޓު ކުރާ މަހުން ނަގަމުން އަންނަ ޓެރިފް ކުޑަކުރުމާއި، ރާއްޖެއަށް ޚާއްސަ އަގެއް ކަނޑައެޅުމުގެ މަޝްވަރާ ކަމަށެވެ.
އެ މަޝްވަރާ ކުރެވިފައިވާ އިރު އެކަން ހާސިލްވާނެ ކަމުގެ ވަރަށް ބޮޑު އުންމީދެއް އޮތްކަމަށް ރައީސުލްޖުމްހޫރިއްޔާ ޑރ މުއިއްޒު ވަނީ ވިދާޅުވެފަ އެވެ.
"ވަރަށް ޚާއްސަކަމެއްގެ ގޮތުގައި ފާހަގަކޮށްލަން މަހުގެ އެކްސްޕޯޓު، ރާއްޖެއިން ތުރުކީއަށް އެކްޕޯޓުކުރާ މަހުން މިހާރު ވަރަށް ބޮޑު ޓެރިފެއް މި އޮންނަނީ. ދެން ހަމަ ވަރަށް ޕޮސިޓިވްކޮށް އެކަން އޮތީ ބަލައިގެންފަ. ރާއްޖެއަށް ޚާއްސަ އެކްސެޕްޝަނެއް އޭގަ ދެވޭނެ ގޮތެއް، ރާއްޖެއަށް ކުޑަ ޓެރިފަކާއި ހަމަޔަށް ކުޑަކުރެވޭނެ ގޮތެއް ބަލައި އެކަމަށް އެއްބަސްވެވޭނެ ގޮތްތަކެއް ހަމަޖެއްސުމުގެ މަސައްކަތް މިހާރު ވަނީ ފެށިފައި"
ރައީސުލްޖުމްހޫރިއްޔާ ޑރ މުއިއްޒު
ރައީސުލްޖުމްހޫރިއްޔާ ވިދާޅުވީ ތުކުރީއަށް އެކްސްޕޯޓު ކުރާ ދިވެހި މަހުން ޓެރިފް ކުޑަކުރުމަކީ ދިވެހި މަސްވެރިންނަށް ވަރަށް ބޮޑެތި ފައިދާތަކެއް ލިބިގެންދާނެ ކަމެއް ކަމަށެވެ.
އީޔޫގެ ގައުމުތަކަށް އެކްސްޕޯޓުކުރާ މަހުގެ ބާވަތްތަކުން ނަގާ ޓެރިފް ކުޑަކުރުމަށް ނިމިދިޔަ ސަރުކާރުން ވެސް ވަރަށް މަސައްކަތްތަކެއް ކުރައްވާފަ އެވެ.
އެހެން ނަމަވެސް، އެކަން މުޅިން ކާމިޔާބު ނުވެ ސަރުކާރު ބަދަލުވެފައިވާއިރު، އެ މަސައްކަތް ކުރިއަށް ގެންދިއުމުގެ އިތުރުން ދިވެހި މަސްވެރިން ބާނާ މަސް އެކްސްޕޯޓުކުރާނެ އާ މާކެޓުތަކެއް ހޯދާނެކަމަށް ފިޝަރީޒް މިނިސްޓަރު އަހުމަދު ޝިޔާމު ވެސް ވަނީ ވިދާޅުވެފަ އެވެ.
އޭގެ އިތުރުން ދިވެހި މަސްވެރިކަން ޕްރޮމޯޓުކުރުމަށް އާ އޭޖެންސީއެއް ގާއިމްކޮށް ފުޅާދާއިރާއެއްގައި އެ މަސައްކަތް ކުރުމަށް ސަރުކާރުގެ ހަފްތާ 14 މަގުޗާޓުގައި ވެސް ވަނީ ހިމަނާފަ އެވެ.
Advertisement
This content is created and paid for by advertisers and does not involve Voice Journalists
